СМІ распавялі аб італійскай віле новага кіраўніка Мінабароны РФ

І аб яго сувязях з Прыгожыным.

Расейскі праект Цэнтр «Досье» вывучыў персанальныя дакументы новага міністра абароны краіны-агрэсаркі Расеі Андрэя Белавусава і пагаварыў з яго знаёмымі, даведаўшыся новыя дэталі пра яго.

Пра гэта гаворыцца ў матэрыяле праекту.

Адзначаецца, што ён мог мець вілу на беразе Міжземнага мора ў муніцыпалітэце Фортэ-дэі-Мармі, Італія. Гэта стала вядома, бо ў 2018 годзе ён абмяркоўваў яе продаж, а патэнцыйным пакупніком стаў чалавек з нумарам пашпарта, які выкарыстоўвалі агенты Масада.

У тым жа годзе Белавусаў даваў тлумачэнні банку Мальты аб паходжанні 600 тысяч еўраў, якія ён клаў на рахунак у замежнай юрысдыкцыі ў «разгар» кампаніі барацьбы з замежнымі актывамі чыноўнікаў у РФ.

Таксама ў матэрыяле паведамляецца, што Белавусаў выявіўся «моцна праваслаўным» чалавекам, які пачынае раніцу і нават працоўныя нарады з малітвы. Акрамя таго, ён вядзе дакумент з галоўнымі жыццёвымі прынцыпамі і важнымі малітвамі, напрыклад, «праходжанне Шляху нясення крыжа (пакора, пакаянне і пошук Бога, служэнне Справе, дапамога людзям, самаразвіццё)».

Цэнтр «Досье» піша, што яшчэ ў 2013 годзе Белавусаў даў сем абяцанняў Багародзіцы, сярод якіх: штодня тэлефанаваць маме, займацца спортам, чытаць па 30 старонак на дзень і «выконваць правілы сэкс-гігіены».

Пры гэтым нягледзячы на сваю «крайнюю рэлігійнасць», на пошце Белавусава знайшлі сляды, прынамсі, аднаго пазашлюбнага рамана з высокапастаўленай супрацоўніцай Агенцтва сацыяльных ініцыятыў Вольгай, якая рэгулярна пісала яму рамантычныя пасланні разам з працоўнымі пытаннямі.

У матэрыяле зазначаецца, што Белавусаў, мяркуючы з усяго, раздзіраўся паміж некалькімі жанчынамі, але летам 2019 года напісаў палюбоўніцы, што вельмі любіць сваю жонку і заклікаў Вольгу больш не пісаць яму.

«Гэта тая жанчына, якую я шукаў усё жыццё. Не пішы мне больш. І не тэлефануй», - гаворыцца ў яго паведамленні.

«Цынічны і жорсткі ты чалавек. І нікога ты не любіш. Сябе аднаго. З гэтай чыноўніцай табе проста зручна», - адказала Вольга. Яна дасылала яму лісты яшчэ некалькі месяцаў, пасля чаго жанчыну звольнілі з Агенцтва.

Таксама паведамляецца, што Белавусаў «не настолькі далёкі ад сілавых ведамстваў, як здаецца», бо стала вядома, што ён падтрымліваў цесныя стасункі з Яўгенам Прыгожыным і цікавіўся тэмай прыватных вайсковых кампаній.

Са слоў крыніцы «Досье», Белавусаў займаўся дзейнасцю Прыгожына.

«Яны з Прыгожыным часам сядзелі проста абняўшыся - натуральна, адзін да аднаго на «ты», «Жэнь» і гэтак далей. Іх працоўныя сустрэчы нагадвалі сямейныя вячоркі з гарбатай - нефармальна прагаворвалі ўсе пытанні, потым ківалі на малодшых супрацоўнікаў, і тыя ўжо ўсё афармлялі ў сапраўдны даклад. Бо сістэма працуе так, што Першы ніколі не прымае пастанову: паступае прапанова, Белавусаў яе прапрацоўвае і рыхтуе даклад (звычайна на ім стаяць подпісы Белавусава і Шайгу), далей гэты даклад трапляе да прэзідэнта. Уладзімір Уладзіміравіч толькі ставіць на ім прыпіску „згодзен“ — і ўсё», — зазначыў суразмоўца «Досье».