Дзве настаўніцы ў Воршы на ўказанне «дырэктара» школы ўзялі крэдытаў на 76 тысяч рублёў

Педагогі такім чынам пасадзейнічалі «міліцыі».

Дзве настаўніцы ў Воршы сталі ахвярамі кібермахляроў, якія назваліся дырэктарам іх школы і далі ўказанне садзейнічаць нібыта супрацоўнікам міліцыі. Пра гэта расказалі ва УУС Віцебскага аблвыканкама.

«З настаўнікамі ў мэсэнджары Telegram звязваўся іх „дырэктар“, а дакладней, нейкі карыстальнік, падпісаны імем дырэктара і з яго фатаграфіяй, узятай з адкрытых крыніц у сетцы. Падчас размовы «дырэктар» паказваў, што з імі зараз звяжуцца прадстаўнікі праваахоўных органаў і ім трэба будзе надаць садзейнічанне», - распавялі ва УУС.

Пазней ашуканцы напісалі гэтым настаўнікам, назваўшыся супрацоўнікамі міліцыі, і пераканалі аршанак узяць крэдыты ў банку. У выніку яны аформілі пазыку на 76 тысяч рублёў. Прычым адна з выкладчыц нават набыла новы тэлефон, бо на старым не ўсталёўваўся файл дадатку, які ёй даслалі аферысты, каб атрымаць выдалены доступ да яе прылады.

Жанчын выратавала толькі тое, што тэрмін залічэння грошай быў перанесены на некалькі дзён. За гэты час яны зразумелі, што маглі трапіцца на вуду ашуканцаў, і звярнуліся ў міліцыю.

Распачатыя крымінальныя справы за замах на махлярства. Зламыснікам пагражае да дзясяці гадоў пазбаўлення волі (у залежнасці ад сумы прычыненай шкоды).