У Расеі пачаліся вучэнні для выкарыстання тактычнай ядзернай зброі

Вучэнні праводзяцца на даручэнне Пуціна.

У Паўднёвай вайсковай акрузе пад кіраўніцтвам Генштаба ўзброеных сіл Расеі пачаўся першы этап вучэнняў у выкарыстанні нестратэгічнай ядзернай зброі, паведаміла прэс-служба Мінабароны РФ.

На першым этапе адпрацоўваецца падача ядзерных боепрыпасаў для комплексаў «Іскандэр», абсталяванне авіяцыі ракетамі з ядзерным боезарадам - у тым ліку спецыяльна сабранымі ракетамі «Кінжал».

Асабовы склад ракетных злучэнняў ПУА адпрацоўвае атрыманне спецбоепрыпасаў, загрузку іх у «Іскандэры» і адпраўку ў пазіцыйны раён для падрыхтоўкі да пускаў. Асабовы склад падраздзяленняў Паветрана-касмічных сіл адпрацоўвае рыштунак авіяцыйных сродкаў паражэння спецбаявымі часткамі і вылеты ў назначаныя раёны патрулявання.

Вучэнні праводзяцца на даручэнне дыктатара Расеі Уладзіміра Пуціна. Яны былі анансаваныя 6 траўня, аднак дакладная дата пачатку вучэнняў не называлася. Сцвярджалася, што мэта вучэнняў - практычная адпрацоўка пытанняў падрыхтоўкі і выкарыстання нестратэгічнай ядзернай зброі.

Апошнюю серыю ядзерных пагроз Пуцін агучыў у пасланні Федэральнаму сходу ў лютым 2024 года. Каментуючы словы прэзідэнта Францыі Эмануэля Макрона аб магчымай адпраўцы ва Украіну заходніх войск, Пуцін заявіў, што «магчымых інтэрвентаў» будуць чакаць «трагічныя наступствы». Такое развіццё падзей «пагражае канфліктам з выкарыстаннем ядзернай зброі, а значыць, знішчэннем цывілізацыі», казаў Пуцін.

ЗША сур'ёзна рыхтаваліся да магчымага ядзернага ўдару Расеі па тэрыторыі Украіны ў канцы 2022 года, паведамляў раней CNN са спасылкай на двух высокапастаўленых чыноўнікаў адміністрацыі Джо Байдэна. З іх словах, ядзерны сцэнар для ўкраінскага канфлікту разглядаўся як рэальны пасля серыі паражэнняў расейскага войска, якое да таго моманту здало Харкаўскую вобласць і было вымушанае пакінуць Херсон. Ацэнка была дадзеная на аснове «вельмі адчувальных звестак», якія атрымала амерыканская выведка, сцвярджаюць крыніцы CNN: разглядалася магчымасць, што Уладзімір Пуцін выкарыстае тактычную ядзерную зброю.

Прадухіліць пераход канфлікту ў ядзерную фазу, са слоў крыніц CNN, дапамагло падлучэнне Кітая і Індыі, якія, у сваю чаргу, націснулі на Пуціна.