Брат Вітольда Ашурка: Справа аб яго забойстве раскрытая, будуць пакараныя ўсе вінаватыя

Андрэй Ашурак упэўнены, што ягонага брата забілі ў калоніі.

Дзень салідарнасці з палітвязнямі адзначаецца 21 траўня ў знак памяці загінулага ў гэты дзень у 2021 годзе палітвязня Вітольда Ашурка. Ён пайшоў з жыцця ў шклоўскай калоніі пры нявысветленых абставінах. «Белсат» паразмаўляў з братам Вітольда Ашурка Андрэем. Ён упэўнены, што ўсе вінаватыя будуць пакараныя і просіць палітвязняў трымацца.

Афіцыйная версія смерці Вітольда Ашурка - спынілася сэрца. Але, калі родным аддалі цела палітвязня, ён быў перабінтаваны ад верху галавы да носа. У магілёўскай трупярні сказалі, што нібыта выпадкова выпусцілі цела.

Андрэй Ашурак упэўнены, што ягонага брата забілі ў калоніі. Гэта ж сцвярджаюць і журналісты-расследавальнікі разам з кіберпартызанамі.

«Справа аб яго забойстве ўжо раскрытая. Не рэжымам, а кіберпартызанамі, нашымі. Ёсць усе прозвішчы, хто там быў, хто што казаў, хто каму тэлефанаваў. Справа проста ў часе. Я не ведаю, колькі пройдзе часу, пакуль будуць затрыманыя і пакараныя ўсе вінаватыя, але я ўпэўнены на 100%, што гэта будзе ў кожным выпадку», - кажа Андрэй Ашурак.

Аб часе, праведзеным з братам, ён успамінае з цеплынёй і ўсмешкай.

«За столькі гадоў, што жылі разам, яркіх успамінаў - мора сіняе. Як ты ні круці, часта ў галаве ўсё гэта праносіцца. Мне нават вылучыць адзін успамін цяжка. Яно такой кінастужкай заўсёды: дзяцінства, юнацтва наша, як ужо дарослыя былі, як на верандзе ў мяне часта-часта каву пілі, ці я да яго прыязджаў. Гэта ж выдатна - прыехаць да брата, пасядзець. Ён патэлефануе: "А ты не прыедзеш да мяне на каву?" Прыедзеш, пагаворыш, абмяркуеш праблемы, планы на будучыню, кіно паглядзіш. Напрыклад, памятаю, ён быў добры майстар рабіць татуіроўкі. І ён рабіў мне. Неяк я прыехаў да яго, гэта якраз быў 2004-ты, напэўна, год. Якраз выйшаў новы галівудскі фільм "Бункер" аб канцы Другой сусветнай вайны. Дык мы нічога нават і не рабілі. Вось так я напаўголы сядзеў і мы глядзелі гэта кіно.

Я маладзейшы за Вітольда на 2,5 гады. Цяпер атрымалася такая парадаксальная рэч: мне ўжо 51 год, а яму засталося 50. І я ўжо старэй, як гэта?» - Кажа Андрэй.

Палітвязням, якія зараз знаходзяцца за кратамі, брат Вітольда Ашурка хацеў бы перадаць, што яны не забытыя.

«Трымайцеся. Вы незаслужана асуджаныя, вы ахвяры гэтага жудаснага крывавага рэжыму. Тое, што вы зараз сядзіце ці сядзелі ў турмах - гэта страх рэжыму перад вамі. Гэта не вы павінны баяцца іх, а яны вас, бо яны саджаюць вас у турмы за вашую дзейнасць. Калі так атрымалася, то дзейнасьць ваша была добрай, значыць яны адчуваюць пагрозу для свайго рэжыму, як усё ў цэлым, так і асабіста кожны. Трымайцеся, пра вас памятаюць усё, пра вас ніхто не забыўся. Вінаватыя будуць пакараныя ў любым выпадку. Вядома, цяжка, цяжка ўявіць, як людзям у турмах пасля таго, як, напрыклад, Вітольда забілі жудасна, па-зверску, уручную. Стаўленне да палітвязняў проста жахлівае. Трымайцеся», - рэзюмуе Андрэй Ашурак.

Па стане на 21 траўня 2024 года ў Беларусі - 1392 палітвязняў. Гэта толькі тыя людзі, пра якіх вядома і якія прызнаныя праваабаронцамі. Рэальныя лічбы могуць быць нашмат большымі.