Польшча абвясціла аб перакідванні дадатковых войск на мяжу з Беларуссю

На мяжы таксама ўсталююць жалезабетонныя вожыкі і частакол.

Варшава мае намер павялічыць колькасць вайскоўцаў на мяжы з Беларуссю, заявіў міністр абароны Польшчы Уладзіслаў Касіняк-Камыш.

«Мы гатовы павялічыць вайсковую прысутнасць на польска-беларускай мяжы. Мы абаронім польскую мяжу, паліцыя і памежная служба атрымаюць падтрымку і найлепшае абсталяванне», - цытуе міністра выданне 300polityka.

З яго слоў, на мяжы ўсталююць жалезабетонныя вожыкі і частакол, а таксама абсталяванне для маніторынгу і барацьбы з беспілотнікамі.

Раней ён паведамляў, што Польшча закупіла ў ЗША чатыры выведвальныя аэрастаты Barbara для назірання за паветранай прасторай на межах з Расеяй і Беларуссю.

Аэрастаты Barbara здольныя выяўляць ракеты, самалёты, беспілотнікі і плывучыя сродкі ў радыусе, большым за 300 км. Яны будуць інтэграваныя з дзейнай у краіне сістэмай СПА.

Да гэтага прэм'ер-міністр Польшчы Дональд Туск заявіў, што Варшава выдаткуе 2,3 млрд еўраў на ўмацаванне бяспекі ўздоўж усходняй мяжы з Расеяй і Беларуссю. «Мы пачалі гэтыя працы, каб зрабіць мяжу Польшчы бяспечнай у мірны час і непранікальнай для ворага падчас вайны», - падкрэсліваў Туск.

З яго слоў, Польшча займае стратэгічнае становішча на ўсходнім флангу NATO і Еўразвязу і адчувае адказнасць за ўсю бяспеку на кантыненце.

У сярэдзіне лютага The Times паведамляла, што краіны Балтыі пабудуюць больш за 1000 бетонных бункераў на межах з Расеяй і Беларуссю. У «Балтыйскую лінію абароны», паводле інфармацыі газеты, увойдуць усе сродкі для стрымлівання патэнцыйных захопнікаў: супрацьтанкавыя міны, равы, калючы дрот і так званыя зубы дракона - пірамідальнага выгляду супрацьтанкавыя вырабы з бетону ці жалезабетону. Побач з межамі размесцяць склады боепрыпасаў. Будаўніцтва плануюць пачаць у студзені наступнага года.

У 2024 годзе вайскоўцы не менш як 10 краін NATO заявілі аб тым, што магчымая агрэсія Расеі супраць краін альянсу - рэальны сцэнар найбліжэйшай будучыні. Дарэчы, міністр абароны Польшчы сказаў, што ўлады рэспублікі не выключаюць нападу Расеі пасля заканчэння вайны ва Украіне. З яго слоў, Мінабароны Польшчы ўжо пачало рабіць канкрэтныя крокі на фоне гэтай пагрозы, у тым ліку занялося ліквідацыяй прабелаў у аснашчэнні войска: падпісаныя кантракты на пастаўкі ўзбраенняў на 19 млрд злотых (больш за 4 млрд еўраў), у асноўным з польскімі абароннымі прадпрыемствамі.