Два самалёты расейскай авіякампаніі за дзень выйшлі з ладу ў паветры

Абодва самалёты былі вымушаныя экстранна прызямліцца ў Цюмені.

Расейскія авіякампаніі працягваюць сутыкацца з тэхнічнымі праблемамі пры перавозках грамадзян. У сераду 22 траўня адразу два самалёты «Ямала» былі вымушаныя экстранна прызямліцца ў Цюмені праз паломкі, паведамляе Уральская транспартная пракуратура.

Раніцай экіпаж Sukhoi Superjet 100, які выконваў рэйс з Уфы ў Новы Урэнгой, паведаміў аб адмове аўтаматыкі. Камандзір паветранага судна пастанавіў рухацца на запасны аэрадром Рошчына ў Цюмені. Прызямленне прайшло звычайна.

Удзень яшчэ адзін самалёт авіякампаніі «Ямал» Airbas 320, які рухаўся маршрутам Уфа - Наябрск, здзейсніў вымушаную пасадку ў тым жа аэрапорце праз разгерметызацыю кабіны пілота. На борце знаходзіліся 93 пасажыры, ніхто не пацярпеў.

Новаўрэнгойская транспартная пракуратура і Цэнтральная міжрэгіянальная следчая ўправа на транспарце СК Расеі праводзяць праверку, высвятляючы абставіны авіяінцыдэнтаў.

Напярэдадні праз тэхнічную няспраўнасць не змог вылецець з Чэлябінска ў Новы Урэнгой самалёт SSJ-100 авіякампаніі Red Wings. Рэйс затрымалі на 16,5 гадзіны. На яго зарэгістраваліся 38 пасажыраў. 21 з іх на час чакання размясцілі ў гатэлі.

Колькасць авіяінцыдэнтаў і больш сур'ёзных здарэнняў, выкліканых тэхнічнымі няспраўнасцямі, вырасла пасля таго, як расейская авіягаліна патрапіла пад санкцыі ЕЗ і ЗША за вайну ва Украіне. У 2023 годзе былі зафіксаваныя не менш як 74 розныя паломкі самалётаў у паветры, што на 38 больш, чым у 2022-м, падлічвала нямецкая даследчая кампанія Jacdec. На кожныя 100 тысяч вылетаў прыпадала амаль 10 авіяздарэнняў, тады як годам раней – толькі пяць, гаварылася ў аналізе даследчай кампаніі Cirium.

Паводле звестак Расавіяцыі, усяго за 11 месяцаў мінулага года ў краіне адбыліся 670 авіяінцыдэнтаў, з якіх 400 былі звязаныя з адмовай тэхнікі, у тым ліку рухавікоў. Праблемы відавочныя: перавозчыкі не могуць легальна закупляць новыя замежныя самалёты і арыгінальныя запчасткі, а авіяўлады дазваляюць выкарыстоўваць дэталі даўжэй, чым прадугледжана нормамі бяспекі, што і прыводзіць да аварый, адзначаў кіраўнік RunAvia Андрэй Патракоў.

Наладзіць уласную вытворчасць у Расеі пакуль не атрымліваецца. На прагнозы кансалтынгавай кампаніі Oliver Wyman, да 2026 года авіяпарк краіны скароціцца больш як удвая.

У верасні 2022 года Міжнародная арганізацыя цывільнай авіяцыі (ІКАО) пасля аўдыту бяспекі палётаў адзначыла Расею «чырвоным сцяжком». Са 193 краін, якія ўваходзяць у ІКАО, такі ж маюць толькі Бутан, Дэмакратычная Рэспубліка Конга і Ліберыя.