У Польшчы зменяцца правілы працаўладкавання для беларусаў

Новаўвядзенні закрануць тых, хто працуе «па-шэраму».

У Польшчы зробяць больш жорсткім доступ замежнікаў да рынку працы - так урад хоча змагацца з працай паводле шэрых схемаў. Адпаведны праект закону апублікаваны на сайце ўрада. Дакумент плануецца прыняць у ІІІ квартале 2024 года.

MOST распавёў аб асноўных прапанаваных захадах.

1. Не будуць выдаваць дазволы на працаўладкаванне іншаземцаў арганізацыям, якія былі створаныя або працуюць галоўным чынам для аблягчэння ўезду ў Польшчу грамадзянам іншых краін.

2. Для наваствораных арганізацый або тых, што выкарыстоўваюць віртуальныя офісы, будуць уведзеныя дадатковыя ўмовы выдачы дазволаў.

3. Абмяжуюць так званы «аўтсорсінг супрацоўнікаў». Мабыць, маюцца на ўвазе схемы, калі намінальна замежніка працаўладкоўвае адно прадпрыемства, а рэальна ён працуе на іншым.

4. Замест так званага «тэсту рынку працы» (працэдуры праверкі, ці можна на прадпрыемства, якое хоча наняць іншаземца, працаўладкаваць беспрацоўнага, які стаіць на біржы працы) плануюць увесці больш хуткую і эфектыўную працэдуру.

5. Узмацняць жорсткасць пакарання за незаконнае працаўладкаванне іншаземцаў або падачу ілжывых звестак аб іх занятасці. Сума штрафу будзе вызначацца прапарцыйна колькасці незаконна працаўладкаваных замежнікаў.

6. Адміністрацыйныя працэдуры, звязаныя з працаўладкаваннем іншаземца і атрыманнем адпаведных дазволаў, плануецца ажыццяўляць у электронным выглядзе.

7. Пагранслужба і Нацыянальная інспекцыя працы змогуць аператыўна кантраляваць законнасць работы іншаземцаў.