Легендарны менскі клуб «Рэактар» зноў адкрыецца ўжо гэтым летам

Новыя гаспадары расказалі падрабязнасці.

Без перабольшання легендарнае месца для тых, чыя маладосць выпала на нулявыя гады, менскі клуб «Рэактар» ізноў адкрыецца ўлетку пад кіраўніцтвам новых уладальнікаў. Аб гэтым Onliner.by паведаміла новая ўладальніца культавага памяшкання на Веры Харужай, 29, падкрэсліўшы, што рамонт і ўсе патрэбныя падрыхтоўчыя працы ўжо ідуць поўным ходам.

Новую ўладальніцу памяшкання, якая надумала ўваскрэсіць легенду, клічуць Святлана Рамонка. У нядаўнім мінулым яна арганізатарка рок-канцэртаў у менскіх клубах. Працавала з гуртамі «Пілот» і «Кукрыніксы», арганізоўвала прэмію «У кедах», якая праходзіла ў пачатку 2010-х у не менш значным клубе «Цэнтр». Таксама, калі загугліць яе імя, то можна знайсці мноства інфармацыі пра працу «вядоўцы мерапрыемстваў і вяселляў».

- Мы з партнёрам выпадкова даведаліся, што клуб Rich Cat, які доўга знаходзіўся на месцы былога «Рэактара», закрыўся і памяшканне зноў здаецца ў арэнду. Пастанавілі аднавіць легенду. У свой час «Рэактар» быў самым культавым клубам у горадзе, і мы памятаем пра гэта. Я патэлефанавала стваральніку арыгінальнага «Рэактара», і ён афіцыйна ўхваліў ідэю і дазволіў карыстацца назвай. Ён быў вельмі рады, што яго стварэнне атрымае новае жыццё.

Мы хочам захаваць рознабаковую працу клуба, аб'яднаць пад адным дахам усе субкультуры - ад року да рэйву і рэпу. Плануем дапамагаць лакальным беларускім музыкам, даючы ім магчымасць выступіць на буйной пляцоўцы. Апроч жывых канцэртаў, на пляцоўцы таксама будуць праходзіць вечарыны з дыджэямі. Ужо зараз нам паступаюць прапановы ад арганізатараў. Наша пляцоўка свабодная і гатовая да супрацоўніцтва!

Цяпер на пляцоўцы ідзе рамонт. У планах усталяваць магутны гук і стварыць новы сучасны дызайн памяшканняў, захаваўшы пры гэтым дух старога «Рэактара». Першы паверх будзе выкананы ў стылі стым-панк, а другі будзе адаптаваны пад Вальгалу і стылю вікінгаў. «Рычкэтаўскіх» вялізных катоў мы аддамо назад — выявілася, што яны знаходзяцца на балансе ГГУ.

Каманда людзей, якая будзе займацца клубам, ужо набраная. Арт-дырэктарам, да прыкладу, стане даволі вядомы спадар Болт, які раней быў арт-дырэктарам Beer&Wine. Ужо ў сярэдзіне ліпеня адкрыецца летняя кавярня і банкетная зала, дзе можна будзе адпачыць і паабедаць.

- Сам абноўлены «Рэактар» плануем адкрыць у канцы ліпеня вялікай двухдзённай вечарынкай. У першы дзень будзе рок-канцэрт, а другі дзень мы аддамо пад электронную музыку ці хіп-хоп, каб публіка мела ўяўленне пра рознабаковы фармат працы клуба. Па выходных у новым «Рэактары» мы будзем ладзіць вечарыны да самай раніцы - усё як у старыя добрыя часы, - распавяла Святлана.