Польшча ўзмацніла ахову галоўнай пляцоўкі для вайсковай дапамогі Украіне

Праз магчымыя расейскія дыверсіі.

Польскія ўлады ўзмацняюць захады бяспекі ў галоўным транзітным вузле для замежнай вайсковай дапамогі Украіне праз асцярогу дыверсій з боку Расеі.

Пра гэта заявіў міністр унутраных спраў Томаш Семаняк, паведамляе Bloomberg.

Семаняк пацвердзіў, што прымаюцца захады для ўзмацнення бяспекі вакол аэрапорта Жэшуў-Ясенка. Размешчаны менш чым за 100 км ад мяжы з Украінай, гэты цэнтр апрацоўвае да 90% заходняй тэхнікі, якая накіроўваецца на лінію фронту. Ён таксама стаў асноўным пунктам прыпынку для замежных чыноўнікаў, якія наведваюць Кіеў.

«Мы сутыкнуліся з замежнай дзяржавай, якая вядзе варожыя і, гаворачы ваеннай мовай, дынамічныя дзеянні на тэрыторыі Польшчы, - заявіў Семаняк у інтэрв'ю ў Варшаве, не ўдакладніўшы меры бяспекі ў аэрапорце. - Нічога падобнага раней не было».

Міністр заявіў, што Польшча сутыкаецца з беспрэцэдэнтным узроўнем замежнага ўмяшання пасля таго, як прэм'ер-міністр Дональд Туск абвясціў, што цэлых 12 чалавек былі затрыманыя ў рамках учынення меркаваных дыверсій, накіраваных з Расеі. Гаворка ідзе пра падпалы, спробы падпалу, а таксама фізічныя напады.

Роля аэрапорта Жэшув-Ясенка ў аперацыі, якая падтрымліваецца Крамлём, стала вядома ў красавіку. Пракуроры заявілі, што арыштавалі падазраванага мужчыну, які абвінавачваецца ў змове з мэтай забойства прэзідэнта Украіны Уладзіміра Зяленскага. У рамках плана мужчына нібыта быў гатовы сабраць інфармацыю аб бяспецы аэрапорта.