Менчукам прапануюць правесці спатканні на даху

Выглядае хораша, каштуе нятанна.

У беларускім TikTok вірусяцца ролікі з прапановай правесці рамантычнае спатканне на даху. Паглядзець на захад з каханай, келіхам шампанскага і найпрыгажэйшымі відамі на Менск – дорага каштуе. У першасным сэнсе: кошт супастаўны з паходам у добрую рэстарацыю. Разбіраемся, як усё створана і навошта трэба.

Для рамантычных спатканняў даступныя дзве лакацыі: дах гатэля «Беларусь» і даволі вядомага «дома Чыжа». Кошт паслугі: 350-400 рублёў за дзве гадзіны. Дадаткова можна аплаціць паслугі фатографа (100 рублёў) і ўпрыгожыць дах пялёсткамі руж (30 рублёў). «Онлайнер» датэлефанаваўся арганізатару Льву, каб даведацца пра дэталі.

- Фактычна мы занятыя добрай справай - дапамагаем хлопцам зрабіць прапанову. У асноўным да нас прыходзяць з гэтым. Мы ўпрыгожваем дах, клічам музыкаў, выдаём посуд і прыборы, крэслы і пледы, накрываем стол. Усё, што застаецца зрабіць хлопцу, - надзець пярсцёнак на палец, - распавядае мужчына.

Некаторых каментатараў у сацсетках бянтэжыць высокі кошт. Чаму 350 рублёў - за што столькі? Леў тлумачыць:

- Ну таму што так... Адны музыкі каштуюць блізу $50 у сярэднім. Калі скласці ўсе выдаткі, нацэнка атрымаецца невысокай. Важна адзначыць, што афіцыйна ў нашай краіне выхад на дах забаронены. А на нашых лакацыях - дазволены, паколькі там ёсць назіральныя пляцоўкі. Фактычна, чалавек сам можа туды прыйсці і ўсё арганізаваць. Але мы робім гэта за яго афіцыйна і прыгожа, дазваляючы зэканоміць процьму часу і сіл. Падаткі мы плацім, праверку ад пажарных і міліцыі праходзім, усё ўзгоднена.

Са слоў арганізатараў, паслуга карыстаецца попытам у гараджан. Але на «залатую жылу» гэты бізнэс не цягне:

- Казаць пра нейкі бізнэс тут гучна і заўчасна ўсё ж такі. Пераважна, мы проста дапамагаем людзям. Працуем мы даўно, колькасць кліентаў стабільная, сезон нядоўгі - фактычна вясна - лета. Фанатаў спатканняў у мароз і пад снегам знаходзіцца не шмат, як вы разумееце.

Акрамя вечара для прапановы, арганізатары таксама прапануюць варыянты з кінавечарам, дзявочнікам ці нават карпаратывам на даху. Можна таксама арандаваць дах для ўласных патрэб: кошт у гэтым выпадку складзе 200 рублёў за гадзіну.