Капсула часу з 60-х: знойдзены культавы амерыканскі спорткар у ідэальным стане

Dodge Charger R/T магутная зараджаная версія мадэлі.

У ЗША знайшлі выдатна захаваны Dodge Charger 1969 года. Знакамітае спартовае аўта праехала ўсяго 19 400 км. Аб ім распавёў у відэа на Youtube блогер Lou Costabile.

Гэты Dodge Charger R/T у добрым стане і не мае патрэбы ў рэстаўрацыі. Яго кузаў, салон і рухавік добра захаваліся, бо доўгі час аўтамабіль стаяў у гаражы і не эксплуатаваўся, таму гэта капсула часу.

Першы ўладальнік выкарыстоўваў аўто ў стрытрэйсінгу і нават мадэрнізаваў яго — замяніў карбюратары і выхлап. Аднак калі ён ажаніўся і стаў бацькам, то ўсё радзей удзельнічаў у вулічных гонках, а з часам увогуле адмовіўся ад іх.

Пасля смерці ўладальніка спорткар набыў гарачы прыхільнік Dodge Charger - гэта ўжо пятае аўто гэтай мадэлі ў яго калекцыі. Аб аўто клапоцяцца і яно вельмі рэдка выязджае на дарогі.

Dodge Charger R/T 1969 года - каштоўная калекцыйная мадэль. Аўтамабіль абсталяваны велізарным 7,2-літровым V8 магутнасцю 375 к.з. і 3-ступеністай аўтаматычнай КПП. Разгон да 100 км/г займае 6 секунд, а максімальная хуткасць перавышае 200 км/г.