Украіна ўстанавіла новы рэкорд, ударыўшы па РФ на 1520 кіламетраў

БПЛА даляцеў да Орска.

Украінскі беспілотнік упаў на рэкорднай адлегласці ад лініі фронту, абнавіўшы рэкорд. БПЛА ўпаў у наваколлях расейскага Орска, паведамілі расейскія СМІ са спасылкай на крыніцы.

Орск яшчэ на 140 кіламетраў далей ад лініі фронту, чым горад Салават у Башкартастане, які да гэтага быў самым аддаленым ад украінскіх пазіцый населеным пунктам, які зазнаў напад беспілотнікаў.

Такім чынам, адзначае https://www.dialog.ua/war/295595_1716731085, украінскі беспілотнік упершыню пераадолеў адлегласць 1520 кіламетраў.

Цэллю самай далёкай да сённяшняга дня атакі ўкраінскага беспілотніка быў нафтаперапрацоўчы завод «Газпром нафтахім» у горадзе Салаваце. Ён зазнаў удар 9 траўня. Салават знаходзіцца ў 1380 кіламетрах па прамой ад кантраляванага УСУ горада Краматорска ва Украіне.

Адлегласць ад Краматорска да Орска — 1520 кіламетраў. Пры гэтым рэальная адлегласць, якую павінен праляцець беспілотнік да Орска, павінна быць яшчэ большай, бо яму трэба аблятаць тэрыторыі паўночнага Казахстана.

На тэрыторыі горада знаходзяцца нафтаперапрацоўчы завод «Нафтааргсінтэз», а таксама Орскі механічны завод, які выпускае артылерыйскія гільзы.