Арцыбіскуп Тадэвуш Кандрусевіч узначаліў набажэнства пасля хваробы

Іерарх раней перанёс інфаркт.

У нядзелю, 26 траўня, арцыбіскуп-эмерыт Тадэвуш Кандрусевіч узначаліў набажэнства святой Імшы ў парафіі Найсвяцейшай Тройцы ў Забалаці (Гарадзенская дыяцэзія, Радунскі дэканат) у парафіяльную ўрачыстасць тытула касцёла, піша Catholic.by.

Пасля пасвячэння біскупа каад'ютара Гарадзенскай дыяцэзіі Уладзіміра Гуляя ў Гародні заслужаны іерарх накіраваўся ў невялікую вясковую парафію ў Воранаўскім раёне, каб на запрашэнне пробашча ксяндза Генрыха Яблонскага падзяліць з мясцовымі вернікамі радасць фестывалю.

Ва ўрачыстасці браў удзел таксама рэктар Міждыяцэзіяльнай вышэйшай духоўнай семінарыі ў Гародні, ксёндз-канонік Віталь Вайцяхоўскі.

У вымаўленай на святой Імшы гаміліі арцыбіскуп Кандрусевіч падкрэсліў, што таямніца Святой Тройцы з'яўляецца «фундаментальнай праўдай у хрысціянскім веравучэнні, якую можна зразумець не розумам, але сэрцам».

«У практыцы паўсядзённага жыцця можна знайсці шмат вобразаў Святой Тройцы. Яны недасканалыя, але набліжаюць яе таямніцу. Нальём у пасудзіну ваду і кінем у яе лёд. Над вадой заўсёды ёсць пара. Маем прыклад Святой Тройцы: вада, лёд і пара. Адно, другое і трэцяе - вада, але ў розных станах», - прывёў прыклад іерарх.

«У паўсядзённым жыцці мы часта назіраем актуальнасць старажытнага лацінскага выраза «Чалавек чалавеку воўк», а павінен быць братам і сястрой, бо ўсе мы створаныя паводле вобраза і падабенства Божага», — падкрэсліў заслужаны іерарх.

Раней паведамлялася, што іерарх a target="_blank" href=https://charter97.org/ru/news/2024/5/24/596266/>перанёс аперацыю і інфаркт.