Украіна атрымае першыя F-16 «вельмі хутка»

Аб гэтым паведаміў міністр абароны Украіны.

Украіна чакае, што краіны-партнёры дадуць знішчальнікі F-16 «вельмі хутка», але пакуль толькі палова абяцаных Захадам паставак паступіла своечасова.

Аб гэтым заявіў міністр абароны Украіны Рустэм Умераў у інтэрв'ю Reuters, апублікаваным у аўторак, 28 траўня.

«Час мае вызначальнае значэнне, і для адбіцця атак нам неабходна, каб пастаўкі былі ажыццёўленыя своечасова», — сказаў Умераў.

Ён спадзяецца, што знішчальнікі F-16 даставяць ва Украіну «вельмі, і вельмі хутка». Са слоў Умерава, Украіне «трэба столькі самалётаў, колькі яна зможа атрымаць».

Міністр адзначыў, што зараз Украіна засяроджаная на падрыхтоўцы персаналу, напрыклад, пілотаў, інфраструктуры, прыцягненні каманд для эксплуатацыі і тэхнічнага абслугоўвання, а таксама працуе над мадэрнізацыяй або прыцягненнем большай колькасці платформ.

Украіна працягвае нарошчваць уласную вытворчасць зброі і беспілотнікаў, а таксама свае магчымасці ў сферы радыёэлектроннай барацьбы, сказаў Умераў.

Прэзідэнт Украіны Уладзімір Зяленскі 28 траўня наведаў авіябазу ў Бельгіі, дзе размешчаныя знішчальнікі F-16, якія плануюць перадаць Украіне.