Двубой Вусіка і Ф'юры перанеслі

Калі будзе рэванш.

Амаль два тыдні таму і ўпершыню за чвэрць стагоддзя ў цяжкай вазе з'явіўся абсалютны чэмпіён.

Справядліва ім стаў Аляксандр Вусік. А прыхільнікі боксу замерлі ў чаканні кастрычніцкага матчу-рэваншу.

Статыстыка на гэты момант у баксёраў наступная. Вусік – 22 перамогі, 14 накаўтаў і ніводнай паразы. Ф'юры – 34 перамогі, 1 нічыя і 1 параза.

Аднак у сераду, 29 траўня, стала вядома, што бой перанясуць.

Пра гэта паведаміў старшыня Галоўнай управы забаваў Саудаўскай Аравіі Туркі Аль аш-Шэйх на старонцы ў Х.

Так, абсалютны чэмпіён свету ў суперцяжкай вазе ўкраінец Аляксандр Вусік і экс-чэмпіён свету ў гэтай жа вазе брытанец Тайсан Ф'юры выйдуць на рынг у снежні.

«Матч-рэванш… запланаваны на 21 снежня 2024 года ў рамках Riyadh Season… Свет зноў убачыць яшчэ адзін гістарычны паядынак... Наша служэнне прыхільнікам боксу прадаўжаецца», – напісаў Аль аш-Шэйх.

І выказаў надзею, што гэты бокс спадабаецца заўзятарам.