Яшчэ два польскія жаўнеры атрымалі раненні на мяжы з Беларуссю
12- 31.05.2024, 14:37
- 7,066
![Яшчэ два польскія жаўнеры атрымалі раненні на мяжы з Беларуссю](https://i.c97.org/ai/443717/aux-head-1636609439-20211111_polish_border_360.jpg)
За апошнія два дні адбыліся больш за 300 спроб незаконнага перасячэння мяжы.
У сераду былі зарэгістраваныя 152 выпадкі, звязаныя з нелегальнай міграцыяй. «Агрэсіўна настроеныя замежнікі за тэхнічным бар'ерам некалькі разоў нападалі на польскія службы. У выніку агрэсіўных дзеянняў, двое жаўнераў атрымалі раненні і былі дастаўленыя ў шпіталь», паведамляе падляшскае аддзяленне Польскай памежнай службы.
Польска-беларускую мяжу мігранты спрабавалі незаконна перасекчы на адрэзках, якія ахоўваюцца заставамі ў Белавежы, Дубічах Царкоўных, Нарэўцы, Міхалове і Чарэмсе.
Учора таксама былі затрыманыя чатыры кур'еры, якія перавозілі агулам 19 замежнікаў. У адным з выпадкаў затрыманы пад Гайнаўкай грамадзянін Польшчы ў легкавым Volkswagen перавозіў 9 мігрантаў.
Тры разы за апошнія два дні пагранічнікі надавалі дапамогу іншаземцам, якія мелі патрэбу ў медыцынскай дапамозе, чатыры чалавекі былі дастаўленыя ў шпіталь.
З пачатку гэтага года на адцінку, які ахоўваўся Падляшскім атрадам пагранічнай аховы, у Польшчу спрабавалі трапіць людзі з 35 краін, падсумоўвае польская пагранічная служба.
Нагадаем, у пачатку тыдня паведамлялася аб раненні польскага жаўнера ў выніку нападу мігрантаў.