Беларус адвучыўся ў каледжы на зваршчыка, кіроўцу, муляра і рамонтніка, але на працу не выйшаў

Колькі яго прымусілі заплаціць?

Касцюковіцкі каледж падаў пазоў на свайго выпускніка, які адвучыўся на некалькіх спецыяльнасцях, аднак працу паводле размеркавання не пачаў. З яго спагналі больш за 12 тысяч рублёў за навучанне, паведамляе «Зеркало» са спасылкай на пракуратуру.

Маладзён з Краснаполля ў 2023 годзе скончыў навучанне ў Касцюковіцкім каледжы паводле спецыяльнасці "Вытворчасць будаўніча-мантажных і рамонтных работ", "Тэхналогія зварачных работ", "Эксплуатацыя і рамонт аўтамабіляў", "Муляр 3 разраду", "Электразваршчык ручной зваркі" Кіроўца аўтамабіля”. Ён вучыўся за кошт бюджэту.

Пасля заканчэння навучання выпускніка накіравалі на працу паводле размеркавання, аднак ён туды нават не прыйшоў. Каледж запатрабаваў вярнуць грошы, выдаткаваныя на навучанне, у добраахвотным парадку, што хлопец адмовіўся зрабіць.

Тады навучальная ўстанова падала пазоў у суд. З маладога чалавека спагналі грошы, выдаткаваныя на ягонае навучанне, сумай звыш 12 тысяч рублёў, а таксама больш за 600 рублёў дзяржаўнай мыты.