У Расеі ад выбуху гранаты загінуў паплечнік Дзмітрыя Паўлічэнкі

Экс-кіраўнік эскадронаў смерці заявіў, што «стаяў з ім плячом да пляча».

У Расеі загінуў ад выбуху гранаты былы вайсковец спецыяльнага прызначэння з Магілёва Юрый Міхайлаў. Яму было ўсяго 47 гадоў, у 1995-1996 гадах ён праходзіў тэрміновую службу ў 1-й роце спецпрызначэння в/ч 3214 (Уручча) у рангу старшыны, паведамляюць праваабаронцы з каманды MAYDAY.TEAM.

Юры Міхайлаў загінуў 2 чэрвеня, а развітанне з загінулым было арганізавана роўна праз тыдзень у Магілёве. На жалобную цырымонію прыехаў асабіста кіраўнік Беларускай асацыяцыі ветэранаў падраздзяленняў спецназа МУС "Гонар", экс-камандзір эскадронаў смерці Дзмітрый Паўлічэнка.

У сваім слове ён згадаў, што ў 90-я Юры Міхайлаў быў адным з тых байцоў, з якімі «давялося разам рызыкаваць, стоячы плячом да пляча, жорстка спыняючы спробы замахаў на канстытуцыйны лад з боку бандытаў і экстрэмісцка настроеных элементаў».

В/ч 3214 была прызначаная для разгону масавых мерапрыемстваў апазіцыі.

Пахаванне было арганізаванае за кошт ахвяраванняў чальцоў асацыяцыі «Гонар». Абставіны смерці экс-вайскоўца не выдаюцца.