УСУ з HIMARS разбілі вайсковы склад у Белгародскай вобласці РФ

У акупантаў вялікія страты.

Расейскія крыніцы пацвярджаюць цяжкія страты войска РФ пасля таго, як УСУ ракетамі разнеслі склад інжынерных войскаў у Белгародскай вобласці.

Украінскае войска ўдарыла з РСЗА HIMARS у раёне поўдня 9 чэрвеня па гаспадарчых памяшканнях расейскіх вайскоўцаў у н.п. Цэнтральнае, Ракіцянскага раёна (30 км да мяжы з Сумскай вобласцю).

Пра гэта паведамляе расейскі Telegram-канал «Дасье шпіёна».

Паводле інфармацыі, якая паступае, расейцы выкарыстоўвалі ўказаную групу будынкаў для захоўвання зброі, боепрыпасаў і інжынернага абсталявання для групоўкі войскаў «Поўнач». Украінскае войска атакавала расейскі склад, выкарыстаўшы як мінімум дзве ракеты РСЗА HIMARS.

Удар накрыў шчыльную колькасць расейскай тэхнікі, у выніку чаго як мінімум пяць вайсковых грузавікоў тыпу «Урал-4320» знішчаныя, яшчэ дзве машыны атрымалі пашкоджанні. Таксама знішчаны БТР мадыфікацыі «82АМ».

Удар прыйшоўся дакладна ў цэль і выклікаў дэтанацыю боепрыпасаў, якія знаходзіліся на складзе. У выніку на паветра ўзляцелі боепрыпасы, супрацьтанкавыя і супрацьпяхотныя міны. Аб стратах сярод асабовага складу пакуль невядома.