У Даніі затрымалі адну з самых вядомых прадстаўніц «расейскай грамады»

Расейку падазраюць у шпіянажы.

Дацкія спецслужбы 11 чэрвеня арыштавалі грамадзянку Расеі, якую абвінавацілі ў садзейнічанні рабоце замежнай выведвальнай службе ў Даніі.

Пра гэта Дацкая служба бяспекі і выведкі (РЭТ) сказала ў заяве грамадскаму вяшчальніку Даніі DR.

Як паведамілі ў спецслужбе, арышт звязаны з публікацыяй «у некалькіх еўрапейскіх СМІ» аб расейскім дзяржаўным фондзе - «Правфонд», які базуецца ў Маскве і ў якім на ключавых пасадах цягам некалькіх гадоў працуюць супрацоўнікі выведкі.

«Яе абвінавачваюць у парушэнні артыкула 108 Крымінальнага кодэкса Даніі, які тычыцца надання замежнай выведвальнай службе магчымасці дзейнічаць у Даніі, напрыклад супрацоўніцтва з мэтай уплыву», - паведамілі ў PET.

Жанчына з'яўляецца адной з самых вядомых прадстаўніц расейскай грамады ў Даніі. Сярод іншага, яна кіруе кансультацыйным цэнтрам для расейскамоўных у адным з гарадоў Зеландыі, піша DR. Згодна з унутранымі дакументамі, з 2017 года гэты цэнтр атрымаў ад «Правфонда» сама меней 338 тысяч дацкіх крон.

Чакаецца, што жанчыну адпусцяць пасля допыту.

Як адзначае DR, маскоўскі «Правфонд», паводле інфармацыі заходніх выведак, насамрэч з'яўляецца часткай расейскай прапагандысцкай кампаніі для стварэння гісторый аб дыскрымінацыі расейскамоўных грамадзян за мяжой.