П'яны гарадзенец пайшоў з нажом на міліцыю

Да гэтага ён хацеў саскочыць з дзявятага паверха.

У Гародні будуць судзіць 27-гадовага мужчыну, які п'яным пад наркотыкамі пагражаў нажом прахожым і міліцыянерам, расказалі ў эфіры тэлеканала «Гродна Плюс».

Крымінальны інцыдэнт здарыўся ў абласным цэнтры 5 студзеня. У міліцыю паведамілі пра мужчыну на вуліцы Агінскага, які спрабаваў саскочыць з 9-павярховага дома, а пасля стаў пагражаць нажом мінакам. Пра неадэкватнага гараджаніна ў міліцыю паведамілі відавочцы. На месца прыбылі супрацоўнікі Дэпартамента аховы. Праваахоўнікі паспрабавалі супакоіць дэбашыра, але ён з нажом пайшоў на супрацоўнікаў міліцыі. Пасля неаднаразовых папярэджанняў міліцыянты стрэлілі ў паветра, і толькі пасля гэтага фігуранта затрымалі.

Гарадзенец быў дастаўлены ва ўстанову аховы здароўя для медагляду і аказання медыцынскай дапамогі, бо да прыезду міліцыі ён парэзаў сабе перадплечча. Экспертыза вызначыла, што затрыманы быў у стане алкагольнага і наркатычнага ап'янення. Аднак падчас сваіх неадэкватных паводзінаў ён усведамляў тое, што адбываецца.

– Праведзеная стацыянарная судова-псіхіятрычная экспертыза не выявіла ў абвінавачанага якіх-небудзь парушэнняў. У момант здзяйснення злачынстваў ён быў разумным, мог усведамляць значэнне сваіх дзеянняў і кіраваць імі, – расказаў намеснік пракурора горада Гродна Аляксандр Сядач.

Мужчыну інкрымінавалі незаконны без мэты збыту абарот наркотыкаў і супраціў праваахоўнікам. Яму пагражае да 7 гадоў зняволення.