70% украінцаў згодныя, што Зяленскі павінен заставацца прэзідэнтам да канца ваеннага становішча

Сацапытанне.

Большасць украінцаў не ставіць пад сумнеў легітымнасць прэзідэнта Украіны Уладзіміра Зяленскага. Пра гэта сведчаць вынікі апытання Кіеўскага міжнароднага інстытута сацыялогіі (КМІС), апублікаваныя 17 чэрвеня.

Падчас інтэрв'ю рэспандэнтаў прасілі выказаць згоду ці нязгоду з шэрагам сцвярджэнняў. Адно са сцвярджэнняў: «Зяленскі павінен быць прэзідэнтам да канца ваеннага становішча». У сярэднім 70% рэспандэнтаў пагадзіліся з гэтым, не згодныя са сцвярджэннем 22%. У залежнасці ад рэгіёну пражывання з гэтым згодныя 65–74% рэспандэнтаў. КМІС адзначае, што, паводле гэтых вынікаў, большасць украінцаў не ставіць пад сумнеў легітымнасць прэзідэнта.

Большасць украінцаў (56%) хутчэй ці цалкам ухваляе дзейнасць Зяленскага на пасадзе прэзідэнта, хутчэй ці цалкам не ўхваляе – 37%. У папярэднім апытанні ў верасні 2023 года 77% ухвалялі ягоную дзейнасць. Адпаведна ўзровень ухвалення прыкметна знізіўся, аднак застаецца на высокім узроўні, адзначылі ў КМІС.

Акрамя гэтага, рэспандэнтаў прасілі адказаць, якое з васьмі словаў ці словазлучэнняў лепш апісвае стаўленне да прэзідэнта. Ёсць тэндэнцыя да зніжэння дзелі тых, хто ставіцца да прэзідэнта з захапленнем (з 33% у ліпені 2022 года да 8% цяпер), але ў цэлым большасць украінцаў (69%) мае нейтральна-станоўчае стаўленне.

Большасць украінцаў (58%) згодная са сцвярджэннем «Украінскія ўлады не павінны ісці на кампрамісы ў перамовах. Украіна будзе прадаўжаць барацьбу, колькі спатрэбіцца». Не згодныя з такім сцвярджэннем 30% рэспандэнтаў. Дзель тых, хто згодны з гэтым сцвярджэннем, знізілася за апошнія два гады (у траўні 2022 года паказнік быў 80%), аднак цяпер усё роўна большасць украінцаў выступае за прадаўжэнне барацьбы столькі, колькі спатрэбіцца. У той самы час 65% згодныя са сцвярджэннем, што вынікі магчымых перамоваў з Расеяй павінныя быць вынесеныя на рэферэндум (не згодныя з гэтым – 25%).

Сярод украінцаў няма выразнага стаўлення да закону аб мабілізацыі, адзначаюць у справаздачы. Рэспандэнтаў прасілі выказаць згоду або нязгоду са сцвярджэннем «Я падтрымліваю новы закон аб мабілізацыі». 34% рэспандэнтаў пагадзіліся (хутчэй ці поўнасцю) з такім сцвярджэннем. У той самы час 20% хутчэй не пагадзіліся, а 32% зусім не пагадзіліся. Яшчэ 14 адсоткаў не адказалі на пытанне.

«Нязгода са сцвярджэннем не тоесная таму, што людзі выступаюць супраць (і тым больш не з'яўляецца сведчаннем стаўлення да патрэбы самой мабілізацыі або неабходнасці даваць адпор ворагу). Безумоўна, частка з тых, хто не згодзен, з'яўляецца менавіта спаборнікамі. У той самы час яшчэ частка можа не пагаджацца толькі з асобнымі складнікамі закону або мець стрыманае, нейтральнае стаўленне», – патлумачылі ў КМІС.

Апытанне праводзілася ў рамках праекту MOBILISE з 26 траўня да 1 чэрвеня 2024 года.