Данія правяла сакрэтную аперацыю па F-16 для Украіны

Стала вядома, калі прыбудзе першы знішчальнік.

У Даніі скончылі падрыхтоўку 50 спецыялістаў па рабоце са знішчальнікамі F-16. Большасць з іх вярнуліся ва Украіну, каб дапамагчы ў падрыхтоўцы першых баявых самалётаў.

Пра гэта распавёў кіраўнік Вайскова-паветраных сіл Даніі Ян Дам у інтэрв'ю. Журналісты называюць падрыхтоўку вайскоўцаў і перадачу самалётаў адной з самых сакрэтных вайсковых аперацый Даніі. Са слоў Дама, на дасягненне вызначальнага аператыўнага эфекту могуць спатрэбіцца «месяцы і гады».

«На гэтыя знішчальнікі ўскладаюцца вельмі вялікія спадзяванні. І мы, мабыць, мусім быць больш рэалістычнымі. F-16, безумоўна, паўплываюць, але яны не зменяць правілы гульні. Ні ў гэтым месяцы, ні ў найбліжэйшыя месяцы», - растлумачыў ён.

Для эфектыўнага выкарыстання F-16 патрабуецца працяглае развіццё ўкраінскіх Паветраных сіл, наяўнасць правільных боепрыпасаў і адаптацыя да складаных баявых задач. «Мая рэкамендацыя ўкраінцам - навучыцца добра карыстацца гэтымі самалётамі, перш чым браць на сябе ўсякія рызыкоўныя місіі. І менавіта пра гэта я кажу з камандуючым Паветраных сіл Украіны», - дадаў Дам.

Вайсковец кажа, што мінулы год на авіябазе Скрыдструп быў вельмі напружаным, бо на падрыхтоўку пілотаў F-16 трэба тры-чатыры гады, а ўкраінцаў навучаюць шэсць-восем месяцаў.

«Цяпер яны адпрацоўваюць начныя палёты, нягледзячы на тое, што ў нас самыя кароткія ночы за год. Але мы проста вымушаныя гэта рабіць, каб прайсці праграму», - тлумачыць ён.

Данія плануе падрыхтаваць да канца года амаль 20 пілотаў, яшчэ блізу 100 навучаць выконваць дапаможныя задачы. «Мы скончылі падрыхтоўку першых 50, большасць з якіх паехалі дадому, каб дапамагчы ў падрыхтоўцы першых баявых самалётаў. Адразу пасля летніх канікулаў мы пачнём падрыхтоўку наступных 50», - сказаў Дам, адзначыўшы, што першая каманда пілотаў яшчэ не цалкам падрыхтаваная, але першыя з іх «вельмі блізкія да гэтага».

Афіцыйна паведамлялася, што першы знішчальнік ад Даніі даставяць ва Украіну ўлетку. Са слоў вайскоўца, базы, з якіх будуць узлятаць F-16, «блізкія да таго, каб быць гатовымі да эксплуатацыі».

«Для расейцаў было б велізарнай стратэгічнай перамогай збіць іх, і мы робім усё магчымае, каб мінімізаваць рызыку, робячы ўкраінцаў максімальна здольнымі. Але я не магу нічога абяцаць. І, вядома, я буду вельмі засмучаны, калі адзін з іх будзе збіты», - дадаў кіраўнік ВПС.

Афіцыйна Капенгаген паабяцаў перадаць Украіне 19 сваіх знішчальнікаў F-16. Прэм'ерка Метэ Фрэдэрыксэн заяўляла, што абмежаванняў для іх выкарыстання не будзе - украінскае войска можа выкарыстоўваць знішчальнікі і за межамі сваёй тэрыторыі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com