Літва ўзмацняе жорсткасць вывазу аўтамабіляў з тэрыторыі ЕЗ у Беларусь

З 4 чэрвеня.

З 4 чэрвеня вывезці набыты ў ЕЗ аўтамабіль з тэрыторыі Літвы ў Беларусь зможа толькі ягоны ўладальнік. Пра гэта паведамляе прэс-служба літоўскай мытні.

З аўторка пры афармленні экспарту, рээкспарту і транзітнай перавозкі аўтамабіляў не старэйшых за пяць гадоў, літоўскім бокам у абавязковым парадку будуць патрабавацца дадатковыя дакументы, якія пацвярджаюць непарушэнне абмежаванняў міжнародных санкцый.

«Акрамя таго, з 4 чэрвеня гэтага года пры экспарце, рээкспарце або транзіце легкавога аўтамабіля, набытага фізічнай асобай, у Беларусь вывезці аўтамабіль зможа толькі ўладальнік», – гаворыцца ў паведамленні.

У літоўскай установе адзначылі, што даверанасці, выдадзеныя ўладальнікам аўтамабіля, напрыклад блізкаму сваяку, брацца да ўвагі не будуць.

У мытні Літвы адзначылі, што ўзмацняюць захады ў рамках падпісанага ў Вільні 9 траўня гэтага года Пяцібаковага еўрапейскага мытнага пагаднення аб выкарыстанні адзіных кантрольных захадаў для рэалізацыі санкцый.

Нагадаем, з 3 чэрвеня ўрад Літвы таксама ўвёў новы пералік тавараў, якія забароненыя для імпарту з Беларусі і Расеі. Людзі паведамляюць, што ў літоўскіх пунктах пропуску ім прапануюць выкідваць прадукты, напоі, цыгарэты ды іншыя тавары (нават тыя, якіх няма ў абмежавальным спісе).