NATO працягне дапамагаць Украіне, калі нават прэзідэнтам ЗША стане Трамп
6- 11.07.2024, 11:22
- 2,306
![NATO працягне дапамагаць Украіне, калі нават прэзідэнтам ЗША стане Трамп](https://i.c97.org/ai/274682/aux-head-1515088077-NATO_360.jpg)
Кіеў атрымае дапамогу $40 мільярдаў.
На саміце NATO ў Вашынгтоне была прынятая пастанова аб наданні Украіне цягам года вайсковай дапамогі на суму 40 млрд еўраў. Пра гэта гаворыцца ў заяве кіраўнікоў дзяржаў і ўрадаў краін - чальцоў Паўночнаатлантычнага альянсу, апублікаванай у сераду, 10 ліпеня, паведамляе «Нямецкая хваля».
Указваецца, што ў гэтай суме будуць улічаныя сродкі, выдзеленыя з 1 студзеня 2024 года. Нямеччына сёлета ўжо ўзяла на сябе абавязацельствы даць Кіеву вайсковую дапамогу на 8 млрд еўраў.
Каардынаванне дапамогі Украіне з Вісбадэна
Як паведаміў генеральны сакратар NATO Енс Столтэнбэрг, на саміце быў таксама ўзгоднены план, які дазваляе гарантаваць наданне Украіне дапамогі нават у выпадку перамогі Дональда Трампа на прэзідэнцкіх выбарах у ЗША ў лістападзе гэтага года.
У рамках гэтага плана пастаўкі NATO ўзбраенняў Украіне, а таксама навучанне ўкраінскіх жаўнераў у Еўропе надалей будуць каардынаваць праз штаб-кватэру альянсу ў нямецкім Вісбадэне з удзелам 700 супрацоўнікаў, у тым ліку - 40 нямецкіх.
«Мэта палягае ў тым, каб перавесці падтрымку Украіны ў сферы бяспекі на сталую аснову і, такім чынам, забяспечыць палепшаную, прадказальную і ўзгодненую падтрымку», - гаворыцца ў заяве краін NATO. Адзначаецца, што задачай новай штаб-кватэры пад назвай NSATU (Nato Security Assistance and Training for Ukraine) будзе таксама дапамога Украіне ў яе далейшым збліжэнні з Паўночнаатлантычным альянсам.
«З пункту гледжання міжнароднага права NSATU не зробіць з NATO ўдзельніцу канфлікту (вайны Расеі супраць Украіны. - Рэд.)», - гаворыцца ў заяве хаўруснікаў. Тым часам прэм'ер-міністр Вугоршчыны Віктар Орбан адмовіўся ад удзелу вугорскіх сіл у працы штаб-кватэры праз асцярогу перад канфрантацыі з Расеяй.
Дагэтуль за каардынаванне дапамогі Украіне адказвалі ЗША. Для гэтага ў штаб-кватэры камандавання УС ЗША ў канцы 2022 года было сфармаванае падраздзяленне з 300 вайскоўцаў пад назвай «Група падтрымкі Украіны ў сферы бяспекі» (Security Assistance Group-Ukraine, SAG-U).
Знішчальнікі F-16 і сістэмы СПА Patriot для Украіны
Як абвясцілі Данія і Нідэрланды, ужо гэтым летам Украіна атрымае «гатовыя да выкарыстання знішчальнікі F-16». Кааліцыя па забеспячэнні Кіева баявымі самалётамі была сфармаваная год таму, аднак іх пастаўкі дагэтуль затрымліваліся.
У сваю чаргу ЗША пацвердзілі гатоўнасць паставіць Украіне яшчэ адну сістэму СПА Patriot. Такім чынам, Кіеў атрымае ад NATO агулам пяць такіх сістэм - на дзве менш, чым запытваў прэзідэнт краіны Уладзімір Зяленскі.
Указваецца, што сёлета 23 з 32 краін NATO выдзеляць на абарону не менш як два адсоткі свайго ВУП. Нямеччына, як заявіў у Вашынгтоне канцлер краіны Олаф Шольц, указаўшы на дасягнутае кіроўнымі партыямі ФРГ пагадненне па федэральным бюджэце, будзе «стабільна» выконваць адпаведнае патрабаванне альянсу. Сёлета, паводле ацэнак, вайсковыя выдаткі ФРГ складуць 2,1% ВУП.
Адсутнасць запрашэння Украіне да сяброўства ў NATO
Запрашэння да ўступлення ў NATO, аднак, на саміце Паўночнаатлантычнага альянсу ў Вашынгтоне не было. «Галоўная прычына - асцярогі ЗША і Нямеччыны перад канфрантацыяй з Расеяй», - піша агенцтва AFP. Між тым, як вынікае з заявы хаўруснікаў, яны мяркуюць, што Украіна знаходзіцца «на незваротным шляху да поўнай еўра-атлантычнай інтэграцыі, у тым ліку чаленства ў NATO».
Палітыка NATO ў дачыненні да Кітая
Як паведамляецца, чальцы Паўночнаатлантычнага альянсу дамовіліся ўзмацніць жорсткасць рыторыкі ў дачыненні да Кітая. У супольнай заяве хаўруснікаў КНР называюць, дарэчы, «памагатым, які грае ключавую ролю» Расеі ў вайне супраць Украіны.
У апошні час заходнія краіны не раз выказвалі меркаванне, што Кітай пастаўляе Расеі тавары падвойнага прызначэння, дзякуючы якім Маскве ўдаецца падтрымліваць баяздольнасць войска.
Размяшчэнне ў Нямеччыне дальнабойных ракет
Як вынікае з заявы краін НАТА, у Нямеччыне з 2026 года будуць часова размешчаныя крылатыя ракеты Tomahawk і іншыя дальнабойныя ўзбраенні. Зенітныя ракеты SM-6 і новыя ўзоры гіпергукавой зброі, «якія маюць значна большую далёкасць, чым цяперашнія сістэмы наземнага базавання ў Еўропе», таксама згадваюцца ў дакуменце.
У Нямеччыне сістэмы ўзбраенняў, здольныя дасягаць тэрыторыі Расеі, будуць ізноў размешчаныя ўпершыню з часоў халоднай вайны, падкрэслівае агенцтва dpa. Дзе канкрэтна яны будуць размешчаныя, не ўдакладняецца.