Forbes: Расейцы страцілі пад Новаміхайлаўкай 300 адзінак тэхнікі
1- 17.07.2024, 11:59
- 3,552
Катастрафічныя страты для акупантаў.
Пакуль УСУ адбівалі наступ акупантаў на Аўдзееўку, яшчэ адна частка расейцаў распачала менш маштабны, але не менш дарагі напад на Новаміхайлаўку.
Як піша Forbes, прыкладна ў той жа час, калі ў сярэдзіне красавіка акупанты захапілі тое, што засталося ад Аўдзееўкі, яны акупавалі і Новаміхайлаўку. Першая бітва абышлася ім даражэй, але толькі ў чыстым выглядзе, а ў маштабе бою такой жа кровапралітнай была і шасцімесячная бітва за Новаміхайлаўку.
Цалкам магчыма, што пры захопе Аўдзееўкі РФ страціла больш за 40 тысяч вайскоўцаў - траціна забітымі, дзве траціны параненымі - плюс больш за 1000 адзінак тэхнікі.
Тым часам у раёне Новаміхайлаўкі УСУ спісалі больш за 300 варожых транспартных сродкаў. Гэта азначае, што страты акупанцыйных войскаў складаюць амаль 13 тысяч забітымі і параненымі. «Страты украінцаў у абедзвюх бітвах былі значна меншымі», - адзначыла выданне.
Журналісты адзначылі, што ў канцы мінулага года сем расейскіх палкоў і брыгад, у тым ліку злашчасная 155-я брыгада марской пяхоты, атакавалі ўкраінскі гарнізон у Новаміхайлаўцы, які складаўся з двух дзейных брыгад. Баявыя дзеянні былі бязлітаснымі. Акупанты страчвалі танкі, у тым ліку Т-54 1950-х гадоў, Т-62 1960-х гадоў і навейшыя Т-72 і Т-80. Украінскія міны, артылерыя і беспілотнікі падбілі дзясяткі танкаў, але расейцы працягвалі наступ. Як і ў бітве за Аўдзееўку, у акупантаў скончылася спецыяльная бранятэхніка, і яны задзейнічалі нямала самаробных машын у якасці замены.
Цяжкія страты, якія УСУ нанеслі расейцам, спынілі, але не прадухілілі акупацыю Новаміхайлаўкі ў сярэдзіне красавіка гэтага года.
Як і ў Аўдзееўцы, украінскім вайскоўцам, якія абаранялі Новвммхайлаўку, вельмі не ставала артылерыйскіх набояў і супрацьтанкавых ракет, у асноўным з-за працяглай адсутнасці дапамогі ЗША, якую блакавалі прыязныя да Расеі заканадаўцы-рэспубліканцы. «Гэтая блакада нарэшце скончылася, калі расейскія войскі ўвайшлі ў Новаміхайлаўку», - канстатавала выданне.
«Коштам 320 машын і тысяч вайскоўцаў за шэсць месяцаў расейцы прасунуліся на 6 км углыб і праз Новаміхайлаўку. Ці вартыя руіны горада той цаны, якую заплаціла Расея - гэта пытанне, на якое могуць адказаць толькі расейцы», - рэзюмавалі журналісты.