Акупантаў выбіваюць з Глыбокага
- 4.07.2024, 8:00
- 8,112
![Акупантаў выбіваюць з Глыбокага](https://i.c97.org/ai/556902/aux-head-1690091530-20230723_bradley_360.jpg)
УСУ вызвалілі новыя тэрыторыі ў Харкаўскай вобласці.
Узброеныя сілы Украіны адбілі пазіцыі каля Ліпцаў у Харкаўскай вобласці і контратакавалі. Пра гэта паведамілі аналітыкі Інстытуту вывучэння вайны ў штодзённай справаздачы за 3 ліпеня.
Са слоў украінскага намесніка камандзіра батальёна беспілотнікаў, Сілы абароны адбілі пазіцыі ля Глыбокага, што на поўнач ад Ліпцаў, на працягу апошніх сямі дзён, у раёне населенага пункта працягваюцца баі.
Расейскія вайскоўцы сцвярджалі, што ўкраінскія байцы працягваюць контратакаваць пад Глыбокім. Тады як украінскі вайсковец паведаміў, што УС РФ увесь час штурмуюць і хутка папаўняюць рэзервы на Харкаўскім кірунку, у выніку гэта спрыяе высокай інтэнсіўнасці баёў у гэтым раёне.
На паведамленне некалькіх расейскіх крыніц, УСУ разгортваюць падмацаванні бліжэй да лініі фронту на поўначы Харкаўшчыны, спрабуючы адбіць тэрыторыю, якую акупаваў вораг.
![](https://i.c97.org/ai/601467/aux-1720069141-1.png)
Аналітыкі адзначылі, што баі таксама працягваліся блізу Ліпцаў, Зялёнага і Нясумнага.
Расейцы рушылі наперад у Ваўчанску. Згодна з геалакацыйным кадрам ад 18 чэрвеня, УС РФ крыху прасунуліся на тэрыторыю Агрэгатнага заводу. Адзін з расейскіх ваенкараў заявіў, што лінія фронту ў Ваўчанску нібыта невыразная, бо ўкраінскія і расейскія войскі могуць утрымліваць пазіцыі «на адлегласці некалькіх метраў».
У ISW уважаюць, што вораг можа праводзіць частковую перадыслакацыю войскаў з Херсонскага і Данецкага кірунку на Харкаўскі.