Каталіцкі святар прыехаў на фестываль у Будслаў у адзенні з нацыянальным арнаментам
4- 6.07.2024, 10:05
- 5,432
Акрамя таго, ксёндз з Пружанаў вядомы яшчэ і як байкер.
Напрыканцы пілігрымкі каталіцкіх вернікаў з Баранавічаў у Будслаў адзін са святароў адпраўляў святую Імшу ў незвычайным уборы. Альба і стала, у якіх ён выйшаў да алтара, былі ўпрыгожаныя беларускімі нацыянальнымі ўзорамі, заўважыў Katolik.life.
Больш за ўсё на сябе звяртае ўвагу святочная стала з яркай вышыванкай. Гэтая накідка з'яўляецца сімвалам крыжа, які нёс Ісус Хрыстос, і светлай ласкі, якая ўпрыгожвае душу прэсвітара.
Мяркуючы з усяго, арнамент на стале быў нанесены паводле індывідуальнай замовы. У каталогу майстэрні Sacris Vestibus, якая ладзіць у Беларусі літургічную вопратку для каталіцкіх святароў, менавіта такіх прадметаў няма.
Святар, які паказаў нацыянальны святочны дрэс-код – пробашч каталіцкай парафіі ў Пружанах ксёндз Павел Ярашэвіч. У альбе з вышыванкай яго бачылі і раней. Акрамя таго, што ксёндз Павел шматразовы ўдзельнік пешых пілігрымак, ён яшчэ і байкер.