Беларуску ў Польшчы не пусцілі на борт Ryanair з праязным дакументам
6- 19.08.2024, 15:19
- 8,554
Але яна змагла дабіцца кампенсацыі.
Канал для праграмістаў у Польшчы Dzic Pic апублікаваў гісторыю чытачкі, якая сутыкнулася з праблемамі падчас паездкі на Кіпр з праязным дакументам.
- Я збіралася паляцець у чэрвені на Кіпр да сваёй сястры, якая працуе юрысткай. У мяне праязны дакумент, бо ў майго беларускага пашпарта скончыўся тэрмін дзеяння. Мы першапачаткова ведалі, што могуць узнікнуць праблемы, аднак надумалі рызыкнуць.
Папярэдне я ўсё ж набрала кіпрскае пасольства ў Варшаве, каб спытаць: ці можна мне перасякаць мяжу з праязным дакументам? Мне адказалі: "На жаль, гэтае пытанне вельмі часта паступае да нас ад грамадзян Беларусі, але мы праўда не ведаем, ці пусцяць вас, бо мы неаднаразова пісалі кіпрыётам, каб яны нам гэта растлумачылі".
“Хех, кіпрыёты”, - падумала я і ўсё адно купіла білет. З багажом ён каштаваў мне 70 еўра. Зваротны білет на ўсялякі выпадак не брала.
І вось дзень вылету. Я пайшла да стойкі рэгістрацыі, папярэдне ўдакладніўшы ў працаўнікоў Ryanair, ці ўсё добра з маімі дакументамі. Яны адказалі, што праблем быць не павінна. Я выдыхнула і пайшла далей.
Паспяхова прайшла security check, мытню і села чакаць самалёт ля брамы.
Бліжэй да пасадкі я пачула, што супрацоўнікі Ryanair праз гучнаўзмацняльнік запрашаюць мяне да стойкі.
Яны сказалі, што я не магу перасякаць мяжу з праязным дакументам і ДНЖ, але ёсць два варыянты:
- праязны дакумент і ў ім віза
- пашпарт Беларусі і ДНЖ
Мы спрабавалі спрачацца, але яны былі непахісныя і не пусцілі мяне ў самалёт.
Пасля гэтага мая сястра склала ім вялікі ліст, у якім мы падрабязна апісалі, што адбылося.
Чытачка паказала вытрымкі з гэтага ліста. У ім спасылаюцца на інфармацыю аб паездках для замежных наведвальнікаў на сайце кіпрскай амбасады. А менавіта, што "асобы, якія маюць дазвол на жыхарства, выдадзены адной з дзяржаў-чальцоў Шэнгенскага пагаднення, не маюць патрэбы ў кароткатэрміновай візе для ўезду на Кіпр на тэрмін знаходжання, які не перавышае 90 дзён на працягу любога 180-дзённага перыяду", ёсць польскі ДНЖ). А таксама на тлумачэнне польскага МУС, што праязны дакумент замежніка пацвярджае асобу і дазваляе перасякаць мяжу.
Акрамя таго, зазначаецца ў лісце, у Дырэктыве ЕЗ аб стандартах кваліфікацыі грамадзян трэціх краін або асоб без грамадзянства ў якасці бенефіцыяраў міжнароднай абароны наўпрост гаворыцца, што праязны дакумент іншаземца прызначаны для паездак за межы краіны.
У канцы аўтарка папрасіла даць пісьмовае тлумачэнне прычын, праз якія беларусцы з праязным дакументам іншаземца не дазволілі ўехаць у Рэспубліку Кіпр, уключаючы спасылкі на адпаведныя прававыя акты. А таксама правесці поўную кампенсацыю сродкаў.
Што было далей?
- Мне давялося доўга чакаць адказу, таму я раю перыядычна іх даймаць, – працягвае чытачка. - Але ў выніку яны мне адказалі, што выплацяць кампенсацыю сумай 400 еўраў і кошт білета ў поўнай суме.
Я паўторна спытала, ці магу я ў будучыні лятаць на Кіпр. Мне падалося, яны не хочуць гэта казаць, бо гэта парушэнне маіх правоў і прызнанне памылкі.
Але вось што мне адказалі: “Паколькі мы атрымалі інфармацыю ад нашага іміграцыйнага аддзела, вы маглі падарожнічаць з гэтымі дакументамі. Акрамя таго, рэкамендуем вам звязацца з пасольствам і спытаць іх”.
“Збіраюся зноў паляцець на Кіпр у верасні. Думаю яшчэ дамагчыся афіцыйнага ліста з дазволам на праходжанне з праязным дакументам”, - рэзюмавала чытачка.