Нямеччына пачала перакідку вайсковай тэхнікі да мяжы з Беларуссю
12- 19.08.2024, 16:46
- 8,150
Задзейнічаная брыгада падвышанай пільнасці.
Ва Узброеных Сілах Літвы паведамілі, што нямецкая брыгада павышанай пільнасці 19 жніўня пачала перакідваць звыш 650 адзінак вайсковай тэхнікі да літоўскага горада Пабрадзе, што недалёка ад мяжы з Беларуссю.
Такія манеўры распачалі для ўдзелу ў вучэннях Grand Eagle-2/24, паведаміла Літоўскае нацыянальнае радыё і тэлевізія (LRT). Вайсковая тэхніка будзе цягам трох дзён (з 19 да 22 жніўня) рухацца ад мяжы з Польшчай да палігона генерала Сільвестраса Жукаўскаса ў Пабрадзе.
Як паведаміла LRT, вучэнні працягнуцца да 8 верасня. «Гэта вучэнне, якое дазваляе вызначыць, наколькі хутка нямецкае войска зможа пераразмеркаваць свае сілы і зрабіць унёсак у літоўскае войска для абароны тэрытарыяльнай цэласнасці Літвы», - напісала крыніца.
Таксама вучэнне нацэленае на падтрыманне «высокага ўзроўню боегатоўнасці ў падраздзяленнях».
Прымацаваная да Літвы нямецкая брыгада павышанай пільнасці дзяжурыць з 2022 года. Туды ўваходзіць блізу 4 тысяч вайскоўцаў, гэта адно з падраздзяленняў сіл хуткага рэагавання нямецкага войска.