15-разовы чэмпіён Беларусі праз аб'яву шукае футбалістаў
3- 19.08.2024, 20:55
- 3,650
![15-разовы чэмпіён Беларусі праз аб'яву шукае футбалістаў](https://i.c97.org/ai/345749/aux-head-1566485830-20190822_bate_new_360.jpg)
Барысаўскі БАТЭ перажывае не найлепшыя часы.
Беспрацоўным гульцам у росквіце сіл самы час паварушыцца, таму што на адным з сайтаў службы занятасці размешчаны нечаканыя вакансіі.
Барысаўскі БАТЭ перажывае не найлепшыя часы. У мінулым сезоне ўпершыню з 2005 года самы тытулаваны клуб краіны застаўся без медалёў нацыянальнага чэмпіянату, фінішаваўшы на 5-й пазіцыі. У гэтым першынстве справы ў "жоўта-сініх" ідуць яшчэ горш. Пасля 17 тураў з 30 каманда, з якой працуе Ігар Крывушэнка, знаходзіцца толькі на 11-й пазіцыі.
Склад БАТЭ цяпер пазбаўлены зорных гульцоў і, на агульную думку, з'яўляецца адным з самых слабых у гісторыі клуба з таго часу, як ён у 1998 годзе прабіўся ў вышэйшую лігу. На апошні кэмп нацыянальнай каманды у траўні не быў выкліканы ніводзін прадстаўнік барысаўскага калектыву.
У банку вакансій "Горад работ" БАТЭ размясціў вакансію адразу на тры месцы. Клуб шукае спартоўца-інструктара, гэта значыць футбаліста, на поўную стаўку з прафесійна-тэхнічнай адукацыяй. Які досвед працы патрабуецца, не канкрэтызуецца.
Затое пазначаецца заробак. Калі кандыдат будзе пасаваць барысаўскай камандзе, дык ён будзе атрымліваць ад 2 да 12 тысяч беларускіх рублёў.