Чарада «Шахедаў» увайшла ў паветраную прастору Беларусі
5- 27.08.2024, 8:06
- 16,110
У паветра паднятая авіяцыя.
Некалькі іранскіх дронаў «Шахед», якія Расея запусціла па Украіне, чарговым разам увайшлі ў паветраную прастору Беларусі. У сувязі з гэтым беларускія ВПС узнялі ў паветра авіяцыю.
Пра гэта паведамляе РБК-Украіна са спасылкай на маніторынгавыя беларускія Telegram-каналы.
Адзначаецца, што а 00:11 адзін з дронаў зайшоў у Беларусь з боку Чарнігаўскай вобласці і рухаўся ў кірунку Чарнобыльскай Зоны.
«У той жа час, а 00:15 з аэрадрома Баранавічы быў узняты знішчальнік ВПС РБ, які зараз накіроўваецца на поўдзень краіны», - гаворыцца ў паведамленні са спасылкай на канал monitor.
А 00:36 «Беларускі Гаюн» напісаў, што ў Беларусь з боку Чарнігаўскай вобласці заходзяць яшчэ два «Шахеды».
«У паветры на поўдні краіны знаходзіцца дзяжурны знішчальнік ВПС РБ з Баранавіч», - паведамілі ў Telegram-канале.