У Швэйцарыі знайшлі новы спосаб вытворчасці шакаладу
6- 28.08.2024, 18:50
- 3,674
![У Швэйцарыі знайшлі новы спосаб вытворчасці шакаладу](https://i.c97.org/ai/506948/aux-head-1657963849-20220716_szokolad_360.jpg)
Без цукру і з выкарыстаннем усяго плоду какавы.
Швэйцарскія навукоўцы адкрылі новы спосаб вырабу шакаладу. Цяпер, замест адных какава-бабоў, выкарыстоўваецца таксама ўвесь плод какавы. Пры гэтым цукар увогуле не дадаецца, піша BBC.
Спосаб распрацавала група навукоўцаў з Федэральнага тэхналагічнага інстытута Цюрыха, пад кіраўніцтвам Кіма Мішры.
У склад шакаладу ўваходзіць мякаць пладоў какавы, а таксама сок і пласт вакол насення плёну (эндакарпій).
У новага гатунку шакаладу ёсць свой сакрэт вырабу. Гэта вельмі салодкі сок плоду какавы. Як сказаў распрацоўнік Кім Мішра, яго смак яскравы і фруктовы, крыху нагадвае смак ананаса.
Сок, які змяшчае 14% цукру, пераганяюць да ўтварэння высокаканцэнтраванага сіропу. Пасля гэтага сіроп змешваецца з мякаццю і туды дадаецца высушаны эндакарпій. Так працэс падрыхтоўкі атрымліваецца максімальна экалагічным - ніводная частка плоду не знікае.
У выніку атрымліваецца какава-жэле - вельмі густое і салодкае на смак. Пры злучэнні жэле з какава-бабамі для вытворчасці шакаладу, яно замяняе цукар, і дадатковыя падсалоджвальнікі ўжо не патрэбныя.
Аднак праблемай пакуль можа быць кошт такога шакаладу. Справа ў тым, што кошт мякаці і соку какавы вышэйшы, чым звычайнага цукру, таму і кошт новага прадукту будзе вышэйшы, чым на звычайны шакалад.
Але, нягледзячы на гэта, вытворцы шакаладу з краін, дзе вырошчваюць какаву (ад Гаваяў да Гватэмалы і Ганы), ужо выйшлі на сувязь з Мішрай, каб атрымаць інфармацыю аб новым метадзе.
Таксама працэсам зацікавіліся кампаніі, якія вырабляюць экалагічна ўстойлівыя прадукты харчавання.
Яны кажуць, што пры традыцыйнай вытворчасці шакаладу, усе часткі какавы, акрамя зерняў застаюцца ў палях і гніюць.