Politico: Гарыс выдаткоўвае і збірае на выбарчую кампанію значна больш сродкаў, чым Трамп

Найбольшай катэгорыяй выдаткаў Нацыянальнага камітэта Дэмакратычнай партыі была агітацыя.

Кампанія кандыдаткі ў прэзідэнты ЗША ад дэмакратаў Камалы Гарыс у жніўні выдаткавала амаль утрая больш, чым каманда яе рэспубліканскага спаборніка Дональда Трампа. Але нават пры гэтым Гарыс сабрала даволі сродкаў, каб павялічыць сваю грашовую перавагу, паведамляе Politico.

Вялікая розніца прыкметная нават нягледзячы на тое, што кампанія Трампа прадаўжала падвышаць свае выдаткі, якія больш чым падвоіліся ў параўнанні з папярэднім месяцам, паводле аналізу справаздачаў аб фінансаванні, пададзеных у Федэральную выбарчую камісію ў пятніцу, 20 верасня.

У той самы час такое разыходжанне падкрэслівае значную фінансавую перавагу Гарыс з набліжэннем выбараў: у кандыдаткі ад дэмакратаў значна больш сродкаў на кампанію, чым у Трампа, і ў яе больш магчымасцяў для іх выкарыстання.

Гарыс увайшла ў жнівень з большай колькасцю грошай, чым Трамп, і здолела сабраць больш, чым выдаткавала за месяц. Кампанія Трампа ж, наадварот, выдаткавала больш, чым сабрала, нягледзячы на значна меншыя выдаткі. У штабе Гарыс паведамілі, што сабралі 190 мільёнаў даляраў, у той час як у Трампа – крыху менш за 45 мільёнаў даляраў.

У жніўні кампанія віцэ-прэзідэнткі Гарыс перавысіла выдаткі былога прэзідэнта Трампа: 174 мільёны даляраў супраць 61 мільёна даляраў. Але перавага Гарыс у фінансаванні і лепшы збор сродкаў азначаюць, што яна скончыла месяц з 235 мільёнамі даляраў, што на сто мільёнаў больш, чым у Трампа.

Прамое фінансаванне кампаніі – толькі частка больш шырокай палітычнай экасістэмы, і Трамп мае значную знешнюю падтрымку ад Рэспубліканскай партыі і групаў, якія займаюцца як традыцыйнай купляй рэкламы, так і агітацыйнай працай. Але грошы на перадвыбарчую кампанію маюць некалькі пераваг. Яны непасрэдна кантралююцца кандыдатамі і іх блізкімі дарадцамі, і кампаніі атрымліваюць лепшыя расцэнкі на тэлерэкламу, чым знешнія групы, што важна, паколькі платныя медыя цяпер з'яўляюцца найбольшай катэгорыяй выдаткаў як для Трампа, так і для Гарыс.

Так, за жнівень каманда кандыдаткі ад дэмакратаў выдаткавала на стварэнне медыяпрадукцыі і набыццё рэкламы $137 млн са $174 млн агульных выдаткаў на кампанію за гэты месяц.

Іншыя буйныя катэгорыі выдаткаў каманды віцэ-прэзідэнткі ўключалі $6,7 млн на авіяпералёты, $6,4 млн на аплату працы і $4,5 млн на рассылку тэкставых паведамленняў.

У Трампа на выдаткі для СМІ сышло 47 мільёнаў даляраў з 61 мільёна даляраў жнівеньскіх выдаткаў, яшчэ 10,1 мільёна даляраў пайшло на паштовыя рассылкі і ўсяго 4,5 мільёна даляраў – на ўсе астатнія катэгорыі выдаткаў.

Кампанія Гарыс і Нацыянальны камітэт Дэмакратычнай партыі налічваюць больш за 1200 супрацоўнікаў у параўнанні з прыкладна 320 кампаніямі Трампа і Нацыянальнага камітэта рэспубліканцаў.

З таго часу як Гарыс уступіла ў выбарчую гонку, яна значна перавысіла ў аб'ёме прывабленых сродкаў і выдатках кампанію Трампа. Віцэ-прэзідэнтка хутка пераадолела фінансавыя цяжкасці, з якімі сутыкнуліся дэмакраты, калі чаканым кандыдатам ад партыі быў прэзідэнт Джо Байдэн.

Станоўчым момантам для рэспубліканцаў можа быць наяўнасць грошай у Нацыянальнага камітэта Рэспубліканскай партыі, які паведаміў, што цягам месяца сабраў $40 млн і выдаткаваў $60 млн, а да канца месяца застаўся з $79 млн. Гэтая сума перавысіла даступныя сродкі Нацыянальнага камітэта Дэмакратычнай партыі, які паведаміў, што сабраў 69 мільёнаў даляраў і выдаткаваў 84 мільёны даляраў, застаўшыся на канец месяца з 50 млн даляраў. Выніковыя звесткі партый не ўключаюць грошы, якія ўсё яшчэ знаходзяцца ў супольных камітэтах у зборы сродкаў.

Найбольшай катэгорыяй выдаткаў Нацыянальнага камітэта Дэмакратычнай партыі была агітацыя, на якую пайшло 10 мільёнаў даляраў. Для Рэспубліканскага камітэта ў жніўні найбольшай катэгорыяй выдаткаў былі паштовыя выдаткі – 4,6 мільёна даляраў.

Трамп таксама ў значнай ступені спадзяецца на вонкавыя групы, у тым ліку для перадвыбарчай дзейнасці, якую большасць кампаній традыцыйна праводзяць самі, напрыклад агітацыю.

У жніўні вонкавыя групы, якія падтрымліваюць Трампа, выдаткавалі больш, чым групы, якія падтрымліваюць Гарыс: 163 мільёна даляраў супраць 104 мільёна даляраў, паводле справаздачаў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com