Названы еўрапейскія гарады з самым чыстым паветрам
1- 3.09.2024, 12:22
- 3,874
![Названы еўрапейскія гарады з самым чыстым паветрам](https://i.c97.org/ai/609262/aux-head-1725355325-20240903_uppsala_360.jpg)
Экспэрты ацанілі паветра ў 372 гарадах.
Швэдскі горад Упсала, размешчаны на поўнач ад Стакгольма, заняў першае месца ў спісе гарадоў Еўропы з самым чыстым паветрам. Рэйтынг складзены Еўрапейскім агенцтвам навакольнага асяроддзя.
Для адзнакі чысціні паветра правяралася ўтрыманне ў ім мелкадысперсных цвёрдых часціц (PM2,5) - чым іх менш, тым чысцейшае паветра. Забруджвальныя паветра мікрачасціны гарадскога пылу выклікаюць захворванні дыхальных шляхоў у людзей і жывёл.
У Упсале ўтрыманне дробных часціц у паветры складае 3,5 мікраграма на кубічны метр (згодна з рэкамендацыямі САЗ, бяспечная норма дробных часціц у паветры - не больш за 5 мікраграмаў на кубічны метр).
Такой чысціні паветра ўдалося дабіцца дзякуючы таму, што ў цэнтры горада забаранілі ездзіць з хуткасцю больш за 30 кіламетраў за гадзіну, а вуліцы пачалі часцей мыць.
Аднак галоўная прычына чыстага паветра - забарона ўязджаць на аўтамабілях з шыпаванымі шынамі ў некалькі гарадскіх раёнаў. У Хельсінкі ўжо два гады таму забаранілі ездзіць з такімі шынамі па адной з вуліц на працягу трох гадоў у якасці эксперымента. Шыпаваныя шыны ствараюць да 40-50% вулічнага пылу, паколькі моцна траўмуюць дарожнае пакрыццё.
10 еўрапейскіх гарадоў з самым чыстым паветрам:
1. Упсала (Швэцыя)
2. Умеа (Швэцыя)
3. Фару (Партугалія)
4. Рэйк'явік (Ісландыя)
5. Оулу (Фінляндыя)
6. Тампэрэ (Фінляндыя)
7. Норчэпінг (Швэцыя)
8. Фуншал (Партугалія)
9. Талін (Эстонія)
10. Нарва (Эстонія)
Горш за ўсё з чысцінёй паветра справы ідуць у Славонскім-Бродзе (Харватыя), Новы-Сончэ (Польшча) і Крэмоне (Італія).
Ацэньвалі паветра ў 372 гарадах Еўропы.