«Найвялікшая праблема» Лукашэнкі працягвае абвастрацца

І гэта ўжо немагчыма схаваць.

Адмоўнае сальда знешняга гандлю ў студзені—верасні павялічылася на 1,4 млрд долараў, або на 45% да таго ж перыяду мінулага года. Пра гэта сведчаць даныя Белстата.

Аб'ём знешняга гандлю таварамі і паслугамі па выніках дзевяці месяцаў склаў 63 млрд 733 млн долараў. Пры гэтым экспарт знізіўся на 2,43% і склаў 29,6 млрд долараў у параўнанні з тым жа перыядам мінулага года. Імпарт за гэты ж перыяд вырас на 2,2% — да 34,1 млрд долараў. У выніку адмоўнае сальда (гаворка пра перавышэнне паставак замежных тавараў і паслуг над іх экспартам) склалася на ўзроўні 4,55 млрд долараў.

Калі глядзець па рэгіёнах, то пастаўкі нашай прадукцыі і паслуг у краіны СНД (перш за ўсё ў Расію) засталіся прыблізна на ўзроўні таго ж перыяду мінулага года. Прырост — 0,3%, аб'ём — 21,7 млрд долараў. Імпарт адтуль — зноў жа ў першую чаргу з РФ — павялічыўся на 1,3% (да 19,8 млрд долараў).

Пры гэтым экспарт у астатнія краіны знізіўся амаль на 10,6% і склаў 7,9 млрд долараў, а імпарт адтуль вырас на 2% — да 14,3 млрд долараў.

Што кажуць пра праблему чыноўнікі

Чыноўнікі не першы год змагаюцца з імпартам, але маюць з гэтым цяжкасці. Тым часам Беларусь усё больш збліжаецца з Расіяй у сферы знешняга гандлю.

У сярэдзіне жніўня 2024 года ў Мінэканомікі распавялі, чаму ўзніклі цяжкасці ў знешнім гандлі: імпарт тавараў апярэджвае экспарт. У ведамстве лічаць, што «вінаватыя» ў гэтым, між іншым, цэны на нафту і калій. Нагадаем, раней гэтае міністэрства папракала ў праблемах знешняга гандлю ў тым ліку насельніцтва — з-за павышанага попыту на імпартныя тавары.

На праблему ў знешнім гандлі 17 чэрвеня 2024 года звяртаў увагу Аляксандр Лукашэнка: яна яго насцярожвае. У той жа дзень тагачасны прэм’ер-міністр Раман Галоўчанка (цяпер ён займае пасаду кіраўніка Нацбанка) патлумачыў, чаму імпарт тавараў перавышае экспарт. На яго думку, «ніякай катастрофы няма». «Калі гаварыць пра прычыны, то яны таксама празаічныя: сусветная цана на нафту вырасла, адпаведна, мы закупаем сыравую нафту, таму гэта паўплывала на павелічэнне кошту імпарту», — заяўляў Раман Галоўчанка.

Таксама Аляксандр Лукашэнка раней неаднаразова казаў пра праблемы са збытам тавараў у Расіі — продажы на гэтым рынку падаюць. 8 верасня дыктатар заявіў, што найвялікшая праблема сёння для Беларусі — знайсці новыя рынкі збыту для айчыннай прадукцыі, якую не ўдаецца рэалізаваць «у сілу пэўных, аб’ектыўных прычын» у Расіі.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com