Удар па какаінавых штабах

Мадура звяртаецца да Пуціна як да саўдзельніка.

Прэзідэнт Венесуэлы Нікалас Мадура адправіў ліст Уладзіміру Пуціну з просьбамі аб ваеннай дапамозе. Пра гэта паведамляе газета «The Washington Post», са спасылкай на ўнутраныя дакументы ўрада ЗША.

У лісце венесуэльскі дыктатар прасіў прадаць Венесуэле ракеты, аднавіць некалькі старых знішчальнікаў Су-20 МК2, адрамантаваць у Расіі пяць радыёлакацыйных станцый, аказаць лагістычную падтрымку, а таксама прадаставіць трохгадовы план фінансавання абароны Венесуэлы праз кампанію «Ростэх».

У пасланні Мадура адзначыў, што расійскія знішчальнікі, якія раней набыла Венесуэла, — гэта «найважнейшы сродак стрымлівання, якім валодаў нацыянальны ўрад краіны перад тварам пагрозы вайны».

Аналітыкі і чыноўнікі, з якімі пагаварыла газета, сказалі, што значную частку ўзбраення Венесуэла закупляла ў Расіі яшчэ пры папярэднім лідары краіны Уга Чавесе. Цяпер гэтае ўзбраенне, паводле слоў суразмоўцаў выдання, у большасці — «суцэльнае ламачча», то бок знаходзіцца ў непрацоўным стане або састарэла.

Ліст Мадуры Пуціну перадаў міністр транспарту Венесуэлы Рамон Селестына Веласкес, які наведваў Маскву ў сярэдзіне кастрычніка, каб сустрэцца з кіраўніком Мінтранса РФ Андрэем Нікіціным.

Акрамя таго, Мадура накіраваў лісты лідарам КНР і Ірана. У Кітая ён папрасіў «пашырыць ваеннае супрацоўніцтва» дзвюх краін, каб супрацьдзейнічаць «эскалацыі канфлікту паміж ЗША і Венесуэлай», у прыватнасці — паскорыць вытворчасць сістэм радыёлакацыйнага выяўлення.

У пасланні да Ірана гаварылася, што Венесуэле патрэбныя «сродкі пасіўнага выяўлення», «глушылкі GPS» і «дроны з дальнасцю палёту 1000 кіламетраў».

Прэзідэнт Венесуэлы звярнуўся па дапамогу на фоне барацьбы ЗША з лацінаамерыканскімі наркакартэлямі. З верасня Злучаныя Штаты нанеслі больш за дзесяць удараў па суднах наркагандляроў, якія ў асноўным адпраўляліся з узбярэжжа Венесуэлы. 24 кастрычніка прэзідэнт ЗША Дональд Трамп паведаміў, што наступным крокам стануць наземныя аперацыі Узброеных Сіл ЗША.

Паводле звестак крыніц выдання The Wall Street Journal, Белы дом ужо вызначыў мэты для нанясення ўдараў па Венесуэле.

Раней Мадура хваліўся, што ў распараджэнні Узброеных Сіл Венесуэлы маецца 5000 пераносных зенітных ракетных комплексаў «Ігла-С» расійскай вытворчасці і што «дзякуючы прэзідэнту Пуціну, Расіі, Кітаю і многім сябрам па ўсім свеце ў Венесуэлы ёсць усё неабходнае абсталяванне, каб гарантаваць мір».

Сусветныя СМІ пішуць, што мэтай амерыканскай аперацыі (СВА?) супраць Венесуэлы з выкарыстаннем авіяносцаў і дэсантных караблёў з’яўляецца не змена рэжыму і акупацыя краіны, а найперш — спыненне паставак наркотыкаў з Венесуэлы (і Калумбіі) ў ЗША. Наркотыкі штогод забіваюць больш амерыканскіх грамадзян, чым гінула падчас вайны з джыхадыстамі на Блізкім Усходзе. Думаю, сусветныя СМІ пішуць не ўсё. Справа яшчэ і ў тым, што Мадура звяртаецца да Пуціна не проста як да саюзніка, але і як да саўдзельніка.

Успомніце самалёты ўрадавага авіяатрада «Расія», злоўленыя на перавозцы какаіну. А гэта ж даўняя традыцыя КДБ — разкладаць заходні свет наркотыкамі, яшчэ гадоў сорак таму вайсковыя грузавыя самалёты СССР перапраўлялі героін з Афганістана ў Берлін, тагачасную апору Заходняй групы войскаў у Германіі, а з Берліна наркотыкі ішлі на Захад. Пра гэта потым пісала перабудовачная прэса.

Думаю, што аператыўнае атачэнне Трампа ўсё гэта ведае і прапануе яму паўдзельнічаць у гібрыднай вайне з Расіяй — паводле прыкладу свайго візаві, спецыяліста ў такіх войнах. То бок не толькі аслабіць (ці ліквідаваць) пуцінскага праксі з падбрушша ЗША, але і пазбавіць пуцінскую машыну дыверсій фінансавай падтрымкі — даходаў ад наркотыкаў.

Хаця, можа, яны маюць на ўвазе, што нехта ў Маскве падсеў на какаін?…

Іосіф Гальперын, kasparov.ru

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com