Лосік: У некаторых вызваленых палітвязняў аднялі пашпарты перад высылкай у Літву

Узамен дакументаў ім выпісалі даведку на звычайным аркушы фармату А4.

У беларускіх зняволеных, якія правялі ў СІЗА КДБ ноч перад вызваленнем і выдварэннем у Літву, аднялі пашпарты. Пра гэта «Радыё Свабода» расказаў адміністратар тэлеграм-канала «Беларусь галаўнога мозгу» Ігар Лосік.

Па словах Лосіка, яшчэ напярэдадні ён знаходзіўся ў ШІЗА Наваполацкай калоніі.

— Яшчэ ўчора мне лілі хлорку на падлогу. Там летам вельмі халодна. Я спаў на голай дошцы яшчэ ўчора. Не чакаў [вызвалення], — расказаў былы вязень.

Аднак раніцай 10 верасня пасля ранішняй праверкі яму загадалі сабраць рэчы, надзелі кайданкі і мех на галаву і павезлі ў аўтамабілі ў Мінск, дзе Лосік трапіў у «амерыканку» — СІЗА КДБ.

— Там нас было 13 чалавек — Мікалай Статкевіч, Дашкевіч, Дзедок — шмат хто. Мы там правялі ноч. І ўсіх, хто там быў, — нас раніцай забралі і прывезлі на мяжу. І ва ўсіх, хто быў у «амерыканцы», забралі пашпарты. То бок мы сюды прыехалі — ні ў каго няма пашпартоў. Забралі фотаздымкі, усе паперы, прысуды, сшыткі — забралі проста ўсё, — расказаў былы палітвязень.

Пра аднятыя пашпарты расказалі і некалькі іншых палітвязняў. Паводле іх, узамен дакументаў ім выпісалі на звычайным аркушы фармату А4 даведку, якая пацвярджае асобу: «Даведка нумар 1 для пацвярджэння асобы. Прозвішча, імя, імя па бацьку». Туды ж уклеілі фота і паставілі пячатку. Менавіта з такімі «дакументамі» яны і трапілі ў Літву.

У Літве на мяжы ім выпісалі візы на 15 дзён. Іх уклеілі на асобны ліст. Ёсць спецыяльны бланк для такіх выпадкаў, куды літоўскія памежнікі ўклейваюць візу. Далей яны ўжо ў Літве павінны прайсці звычайны шлях атрымання гуманітарнага статусу.

Нагадаем, 11 верасня стала вядома пра вызваленне 52 палітвязняў у Беларусі. З іх 14 — замежнікі.

Зняволеных адправілі ў Літву, хоць некаторыя з іх пасля казалі, што не хацелі з'язджаць з Беларусі.

Адзін з вызваленых, палітык Мікалай Статкевіч, урэшце адмовіўся ехаць у Літву і вярнуўся на беларускі бок.

— Было некалькі спробаў яго ўгаварыць: і амерыканскія дыпламаты, і жонка, і яшчэ нейкая жанчына. Мне далі пяць хвілін, гэта была апошняя спроба. Завялі туды, гэта адбывалася ў Беларусі, на памежным пераходзе. Ён адмовіўся. Ён лічыць, што Лукашэнка не вырашае яго лёс. Ён будзе знаходзіцца там, дзе хоча, і начхаць яму на «вашага калгаснага лідара». Ён хоча знаходзіцца ў Беларусі, — перадаў словы Статкевіча ягоны саратнік Яўген Вільскі.

Пасля таго як стала канчаткова ясна, што Мікалай Статкевіч не зменіць свайго рашэння, яго вывезлі ў невядомым напрамку. Паводле слоў Вільскага, гэта рабілі людзі ў масках, якія ўвесь час знаходзіліся побач.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com