Маск паказаў лятаючую «Tesla»

Спарткар пераскаквае праз машыны і робіць сальта ў паветры.

Tesla паказала новае пакаленне электрычнага спарткара Roadster, здольнага адрывацца ад зямлі і пераварочвацца ў паветры. Такія магчымасці яму забяспечваюць дзесяць рэактыўных паскаральнікаў, створаных на базе тэхналогій SpaceX. Гэта прадэманстравалі 15 кастрычніка падчас прэзентацыі, якую кампанія транслявала у прамым эфіры.

Шоў адбылося на пляцоўцы SpaceX у Тэхасе. На сцэну выйшлі Ілон Маск, галоўны дызайнер Tesla Франц фон Хольцхаўзэн і віцэ-прэзідэнт кампаніі Ларс Мораві.

Франц фон Хольцхаўзэн нагадаў, што першы Tesla Roadster з'явіўся каля 20 гадоў таму. Менавіта з-за яго дызайнер у свой час і прыйшоў працаваць у кампанію.

Глядачам паказалі адразу некалькі трукаў. Roadster заехаў на вертыкальны пандус, здзейсніў пераварот у паветры і мякка прызямліўся дзякуючы паскаральнікам. Затым спарткар пераляцеў праз іншыя аўтамабілі Tesla, крутануўшыся вакол уласнай восі, а пазней праехаў па спецыяльнай рампе ўверх коламі. Калі запрацавалі ўсе дзесяць газавых паскаральнікаў, пляцоўку завалакло дымам.

Чалавека ў двухмеснай машыне не было, замест яго пасадзілі манекен. Маск пажартаваў, што так зрабілі, каб нікога не забіць падчас рызыкоўных выпрабаванняў. Перад стартам ён шчыра папярэдзіў публіку:

«Поспех не гарантаваны. Я сур'ёзна. Гэта, напэўна, спрацуе, але калі не — мы на бяспечнай адлегласці», — сказаў мільярдэр.

Як патлумачыў Маск, «лятаць» аўтамабілю дапамагаюць паскаральнікі, што працуюць на сціснутым газе. Яны дазваляюць рэзка набраць хуткасць на зямлі, узляцець і манеўраваць у паветры.

Новы Roadster будуць выпускаць у трох версіях. Звычайная дарожная Performance, паводле заяўленых даных, зможа разганяцца да 96 км/г менш чым за 1,6 секунды. Версія Sport атрымае дадатковыя газавыя паскаральнікі ў задняй частцы кузава і будзе набіраць 100 км/г за 0,9 секунды.

Найбольш «ракетнай» стане мадыфікацыя Rocket. Паскаральнікі ў ёй размесцяць па ўсім кузаве, каб утрымліваць машыну роўна падчас кароткіх палётаў. Разгон да ста ў яе заяўлены за 0,59 секунды, а максімальная хуткасць складзе 370 км/г. Таксама на прэзентацыі прагучала лічба 0,81 секунды да 100 км/г, аднак да якой менавіта версіі яна адносіцца, не ўдакладнілі.

«Яна можа лятаць, як ракета. Можа круціць «бочкі», вар'яцкую гімнастыку — усё што заўгодна. Гэта не абавязкова аўтамабіль, аптымізаваны пад бяспеку. Але лічыльнік задавальнення яна выкручвае на 11 з 10», — заявіў Маск.

Паказ наўмысна вялі ў прамым эфіры. Паводле слоў кіраўніка Tesla, глядачы павінны былі ўласнымі вачыма пераканацца, што трукі сапраўдныя, а не згенераваныя штучным інтэлектам.

«Нам патрэбная аўдыторыя, каб даказаць, што гэта не штучны інтэлект і не сістэмная інтэграцыя. Дык што вы, хлопцы, можаце расказаць людзям, што бачылі гэта ўласнымі вачыма, таму што ў тое, што вы бачыце ўласнымі вачыма, вы не паверыце», — сказаў ён.

Калі адзін з паветраных трукаў атрымаўся, мільярдэр каротка пракаментаваў: «Ну, спрацавала», а ўсё шоў назваў «вар'яцтвам».

Масавую вытворчасць Tesla плануе запусціць у 2028 годзе.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com