Да прыезду Ладуцькі ў менскім двары эвакуявалі машыны жыхароў

Супрацоўнікі ДАІ эвакуявалі машыны менчукоў, каб паказаць «мэру», што праблем з паркоўкамі ў дварах няма.

Старшыня Менгарвыканкама робіць сёння традыцыйны вясновы аб'езд раёнаў сталіцы.

У кожным з іх Мікалаю Ладуцьку дэманструюць паказальную прыдваровую тэрыторыю і распавядаюць пра планы далейшага развіцця раёна. Мяркуючы па ўсім, гарадскі кіраўнік паездкай застанецца задаволены, - двары да яго прыезду ператварыліся ў сапраўдныя пацёмкінскія вёскі. Onliner.by у падрабязнасцях разгледзеў дзіўныя метамарфозы, якія адбываліся каля звычайнай пяціпавярхоўкі перад прыездам старшыні Менгарвыканкама.

Прачнуўшыся раніцай, жыхары дамоў 114 і 116 па вуліцы Казінца не пазналі свой двор. Клумбы ўздоўж тратуараў мільгаюць свежапасажанымі кветкамі, на дзіцячай пляцоўцы з'явіліся новыя арэлі і іншыя «атракцыёны», паміж двух нядаўна пафарбаваных жалезных слупоў вісіць валейбольная сетка. У двары небывалае ажыўленне - два дзесяткі рабочых і дворнікаў актыўна праполваюць кветнікі, падфарбоўваюць лаўкі, урны і нават каналізацыйныя люкі. Нават дырэктар ЖЭСа ўласнаручна падсыпае каляровы пясок паміж кветкамі, выводзячы вычварны ўзор.

Сённяшняя мітусня стала апагеем тыднёвай падрыхтоўкі да візіту высокага госця. За гэты час было пафарбавана ўсё, што можна было пафарбаваць, праполата і перакапана ўсё, што ўдалося перакапаць. Дворнікі ў гэтыя дні паказалі вяршыні майстэрства - газоны каля дамоў хіба што не пыласосілі, а агароджы вакол смеццевых бакаў абзавяліся прыбранымі аплікацыямі.

«Гэта проста здзек нейкі! - абураецца пажылая жанчына. - Няўжо для таго каб навесці парадак, патрабуецца візіт кіраўніка горада? Бо ўмеюць жа, калі хочуць! Чаму мы нічога падобнага раней не бачылі?»

Больш за ўсё абураюцца ўладальнікі аўтамабіляў. Ужо вечарам на лабавых шклах іх аўто з'явіліся аб'явы з патрабаваннем прыбраць машыны з тэрыторыі двара. З тымі, хто сваё аўто не прыбраў, паступілі проста - іх машыны эвакуявалі. У 70-гадовага пенсіянера ў машыне няма акумулятара, яе эвакуявалі, і цяпер стары ламае галаву, як пасля вярнуць аўто пад сваё акно.

«Машыны перавозім і пакідаем ўздоўж абочыны непадалёк адсюль, - кажа супрацоўнік ДАІ. - Калі мерапрыемства пройдзе, жыхары змогуць самастойна перагнаць машыны на старое месца. А пакуль мэр павінен бачыць, што праблем з паркоўкамі няма».

У гэты час у суседнім двары жыццё ішло звычайным парадкам.

Да прыезду старшыні Менгарвыканкама застаюцца лічаныя хвіліны. Чыноўнікі робяць апошнія штрыхі.

«Грамадзянін, куды ж вы майкі развешваеце! - абураецца мужчына ў касцюме, убачыўшы жыхара 114 дома, які вырашыў развесіць бялізну на сушылку каля акна. - Прыбярыце, калі ласка, павесіце праз пару гадзін!»

Дзве супрацоўніцы з адміністрацыі раёна з падазрэннем разглядаюць жанчыну, якая стаіць непадалёк - яна пагражала звярнуцца да старшыні Менгарвыканкама са скаргай. Скаргі ў гэты светлы пагодлівы травеньскі дзень нікому з людзей у касцюмах не патрэбныя.

І вось у двор заязджае аўтобус з дэлегацыяй Менгарвыканкама. Мікалай Ладуцька з чыноўнікамі праходзіць да стэнда, устаноўленага на апусцелай паркоўцы, і выслухоўвае кароткі даклад, які доўжыцца не больш за 10 хвілін.

Вось і ўсё. Ладуцька з'ехаў. Ледзь ён схаваўся за паваротам, валейбольную сетку, пазычаную аж у суседняй школе, знялі. Дворнікі і супрацоўнікі ЖЭСа разышліся выконваць сваю паўсядзённую працу, якой за апошнія некалькі дзён аўралу назапасілася нямала. А бабулі каля пад'езда ўжо абмяркоўваюць, колькі дзён прастаяць высаджаныя пад іх вокнамі туі. Спакуса «экспрапрыяваць» іх на дачу напэўна з'явіцца ў многіх.