Cамалёт ВПС РФ ледзь не сутыкнуўся з авіялайнерам над Балтыйскім морам
26- 13.12.2014, 20:53
- 24,709
У небе над Балтыйскім морам адбылося небяспечнае збліжэнне расейскага вайсковага самалёта і пасажырскага лайнера.
Пра гэта паведаміла міністэрства абароны Швецыі, паведамляе BBC. Інцыдэнт адбыўся недзе ў поўдзень у пятніцу каля паўднёвага берага Швецыі непадалёк ад горада Мальмё, заявіў міністр абароны краіны Петэр Хультквіст.
Расейскі самалёт радыёэлектроннай разведкі ляцеў з выключанымі транспондэрамі, з прычыны чаго ён не быў бачны на радарах грамадзянскай авіяцыі. Яго заўважылі вайскова-паветраныя сілы як Швецыі, так і Даніі. Шведскія ВПС паднялі ў паветра некалькі знішчальнікаў і рэкамендавалі органам грамадзянскай авіяцыі змяніць курс пасажырскага самалёта.
"Гэта сур'ёзна, недапушчальна і папросту небяспечна", - заявіў Хультквіст.
Паведамляецца, што інцыдэнт адбыўся ў міжнароднай паветранай прасторы, і расейскі самалёт не парушыў мяжу Швецыі.
Раней Еўрапейскае агенцтва авіяцыйнай бяспекі (EASA) пачало расследаванне серыі выпадкаў небяспечнага збліжэння ў паветры грамадзянскіх і вайсковых самалётаў.