«Украбаронпрам» цалкам спыніў пастаўкі ваеннай прадукцыі ў Расею

Заявы аб працягу Украінай паставак у РФ прадукцыі ваеннага і падвойнага прызначэння не адпавядаюць рэчаіснасці.

Пра гэта паведаміў в.а. генеральнага дырэктара канцэрна «Украбаронпрам» Юрый Цярэшчанка, інфармуе Цензор.НЕТ.

«Падкрэсліваем, што ГК «Украбаронпрам» часова прыпыніў усе адгрузкі прадукцыі ў гэтую краіну», - Юрый Цярэшчанка пракаментаваў заявы ўкраінскіх і расейскіх прадстаўнікоў аб стане ВТС паміж Украінай і РФ.

Паводле яго слоў, мараторый на пастаўкі ў РФ прадукцыі ваеннага і падвойнага прызначэння з'яўляецца «ўсвядомленым рашэннем украінскай дзяржавы ва ўмовах існуючага стану двухбаковых адносінаў».

Разам з тым Цярэшчанка паведаміў, што ўкраінскі ўрад разам з канцэрнам рыхтуюць механізмы кампенсацыі магчымых бягучых страт асобных прадпрыемстваў.

«Мы ўсведамляем магчымыя негатыўныя наступствы для асобных прадпрыемстваў у выніку прыпынення супрацоўніцтва з РФ. Для іх пазбягання, а таксама для зняцця напружання ў працоўных калектывах мы ўдасканальваем сістэму ўнутраных закупак. Адначасова рыхтуюцца знешнія кантракты, накіраваныя на аператыўную кампенсацыю магчымых бягучых страт», - адзначыў Юрый Цярэшчанка.

Нагадаем, тыдзень таму з'явілася інфармацыя аб тым, што ўкраінскія прадпрыемствы працягваюць пастаўкі ваеннай прадукцыі ў Расею.