Адэсіты рыхтуюць «гарачы» прыём сепаратыстам

Адэсіты закупляюць бронекамізэлькі, узводзяць блок-посты і арганізоўваюць бясплатныя медыцынскія заняткі для жадаючых.

Адэсіты рыхтуюцца да магчымай атакі прарасейскіх баявікоў. У горадзе прынятыя беспрэцэдэнтныя меры па абароне, паведамляе 048.ua.

Як у сваім «Фэйсбуку» напісала актывістка Зоя Казанжы, у Адэсе разгортваюцца блок-посты.

«Гэта стацыянарныя ўмацаванні з усім неабходным. Мабілізацыя добраахвотнікаў, экспрэс-падрыхтоўка і інструктаж ажыццяўляюцца з учорашняга дня. Займаюцца спецыялісты.

Ужо ажыццяўляецца патруляванне Аўтамайданам горада ў кругласутачным рэжыме. Арганізаваныя мабільныя групы, ёсць маршруты і іншае.

Заканчваецца экіпіроўка адэскай Самаабароны. 14 красавіка, у 18.30 гадзін, быў размешчаны нумар карткі з просьбай дапамагчы ў набыцці бронекамізэлек. Па стане на сёння, на 16.30 гадзін, на рахунку + тыя грошы, што перадавалі асабіста, утварылася - 53 900 грыўняў. Бронекамізэлькі для Самаабароны ў колькасці 30 штук ужо едуць у Адэсу. На іх набыццё было выдаткавана 33 000 грыўняў. Рэшта - 20 900 грыўняў. Шукаем (знайшлі) і замаўляем яшчэ, таму як трэба. Аказваецца, бронекамізэлькі ва Украіне расхопліваюць, як гарачыя піражкі. Іх не паспяваюць шыць.

Грошы прыйшлі з Адэсы (найбольшыя сумы), Вены, Кіева, Львова, Днепрапятроўска і, Увага! - Масквы і Санкт-Пецярбурга! Але большасць сум суправаджаліся прозвішчамі. Усім - дзякуй!»

Какзанжы таксама піша: «Вялікая колькасць адэсітаў аказваюць дапамогу - матэрыяльную, фінансавую, рэсурсную - любую! Некалькі тысяч мужчын актыўна займаюцца працай у сферы бяспекі. Арганізаваныя бясплатныя медыцынскія заняткі для жадаючых. Валанцёры займаюцца арганізацыяй харчавання на блок-постах. Купляюць бензін і тэлефонныя карткі.

Усё адбываецца з учорашняга дня. Усе працуюць у кругласутачным рэжыме. Мы паспелі вельмі шмат што зрабіць.

У нас няма мясцовага Каламойскага, нам няма на каго спадзявацца, таму мы самі. Адэсіты сапраўды неверагодныя!»

Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.

15 красавіка ў выніку аперацыі ўкраінскіх сілавікоў быў вызвалены захоплены расейскімі дыверсантамі і сепаратыстамі горад Краматорск на поўначы Данецкай вобласці.