Дэпутат у Новаазоўску абараніў сцяг Украіны ад узброеных баевікоў

Дэпутат Новаазоўскага раённага савета Данецкай вобласці Васіль Каваленка аказаў супраціў сепаратыстам.

Пра інцыдэнт, які адбыўся на даху будынка ён распавёў «Новостям Донбасса».

«Пад'ехаў як дэпутат своечасова. Да свайго жаху ўбачыў над будынкам сцяг «Данецкай рэспублікі». Натоўп з георгіеўскімі стужачкамі і нікога з сілавікоў. Раз'юшаны, на жаль, заляцеў у прыёмную райсавета (старшыні не было на месцы) і запатрабаваў свой ​​украінскі сцяг. Сказалі, што не ведаюць дзе. Падымаюся на другі паверх і заходжу ў кабінет старшыні адміністрацыі дзе знаходзіўся і кіраўнік райсавета. Таксама запатрабаваў сцяг. Па маім твары зразумелі, што лепш аддаць. Аддалі», - кажа Васіль Каваленка.

Ён схаваў сцяг і падняўся на дах будынка, каб вярнуць яго на месца.

«Зрываю чужы сцяг (ад нервовага напружання рукі не слухаюцца) і вывешваю ўкраінскі. Надзейна хаваю чужую сімволіку неіснуючай ДР і чакаю. Як мяркуецца, чакаю малойчыкаў з арматурай. Вельмі шкадую, што я адзін. Дастаткова было б чацвярых, каб заблакаваць выхад на паддашак. З'явіліся. Большасць нецвярозыя. Згадалі пра магчымасць прымянення арматуры. Аднаму на даху чацвёртага паверха заставалася толькі прапанаваць кампраміс - вешайце свой​​, а я ўкраінскі. Замест згоды мацюкі і арматурная пагроза. Страху не было. Не ведаю, чым бы магло скончыцца, калі б на дах не падняліся мянты і кіраўнік раёна», - распавёў ён.

Ад дэпутата запатрабавалі вярнуць украінскі сцяг, аднак ён адмовіўся.

«Калі падрасце ўнук, пакажу яму сцяг і распавяду пра смутныя часы, калі дэпутаты са сваімі начальнікамі прадавалі Украіну і галасавалі за абвяшчэнне дзяржаўнай самастойнасці Данецкай Народнай Рэспублікі. Аднагалосна. Акрамя яго дзеда», - заявіў Васіль Каваленка.

Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.

15 красавіка ў выніку аперацыі ўкраінскіх сілавікоў быў вызвалены захоплены расейскімі дыверсантамі і сепаратыстамі аэрадром горада Краматорск на поўначы Данецкай вобласці.

17 красавіка ўкраінскія вайскоўцы адбілі атаку сепаратыстаў пад кіраўніцтвам афіцэраў ГВУ на вайсковую частку ў Марыупалі на поўдні Данецкай вобласці. Трое нападнікаў былі забітыя, больш за 60 затрыманыя.