Пад Валожынам школьнік выратаваў дзіця, якое танула

Школьнік з Маладзечна выратаваў першакласніка, які тануў удавялося рацэ ў вёсцы Падбярэзь Валожынскага раёна.

Уладзімір Грахоўскі ішоў недалёка ад ракі (Заходняя Бярэзіна) і пачуў дзіцячыя галасы. На беразе ракі стаяў тузін школьнікаў, паведамляе "Маладзечненская газета". "Мяне нешта насцярожыла, хоць на дапамогу ніхто не клікаў", - падзяліўся юнак. Ён хутка падышоў да іх і заўважыў дзіця, якое танула ў рацэ. Уладзімір нырнуў у раку.

"Да яго давялося плыць метраў сем. Не памятаю, была халодная вада, не ведаю, якая там глыбіня, але з маім ростам (пад 180 сантыметраў) дна я так і не адчуў. Непадалёк была дамба, і малога пачало зносіць плынню. Але выхапіць Лёшу з воднай стыхіі ўсё ж удалося. Гэта, дарэчы, мой сусед, ён першакласнік. Як трапіў у ваду - невядома. Каля ракі расце шмат пагнутых дрэў, і дзеці любяць па іх лазіць…", - кажа ён.

Уладзімір упэўнены, што на ягоным месцы так зрабіў бы кожны. Аб учынку хлопца стала вядома, калі інфармацыя аб выратаванні дайшла да Беларускага рэспубліканскага таварыства выратавання на водах. Старшыня раённай арганізацыі таварыства ўручыў Грахоўскаму Ганаровую грамату і грашовую ўзнагароду.