Дырэктар фабрыкі гародніны: «Ды ў нас 92 адсоткі імпарту ў кожным агурку»

Агуркі па 50 - 55 тысяч пасля новага года здзівілі многіх беларусаў.

- Як так! Ужо агуркі чаго падаражэлі? - здзівіліся беларусы. - Яны ж не імпартныя, вада, зямля - усё сваё.

Каб высветліць гэтае пытанне, журналісты «Комсомольской правды в Беларуси» адправіліся на Менскую агароднінную фабрыку.

«Насенне – галандскае і субстрат таксама»

Велізарная агурковая цяпліца займае 1,6 гектара. Велізарны шкляны будынак вышынёю шэсць метраў стаіць на невялікай горцы за адзін прыпынак ад станцыі метро «Магілёўская».

- Агуркі мы вырошчваем паводле галандскай тэхналогіі. Гэта малааб'ёмная культура вырошчвання, - тузае спецыяльны шнурок, каб адкрыць дзверы, галоўны тэхнолаг прадпрыемства Ніна Балашэнка. Журналісты накідваюць халаты і заходзяць унутр. Пасля вуліцы тут горача, 23 градусы цяпла. Топяць цяпліцы ў асноўным газам.

Агуркі з магутным лісцем растуць не на зямлі, а ў падвесных латках. Сцёблы ўюцца па высокіх вяроўках, якія мацуюцца да падоўжнага дроту. Каб сабраць ураджай, работнікі падымаюцца наверх на спецыяльных механічных пад'ёмніках. Таксама імпартных.

- А гэта мінеральная вата, - паказвае Ніна Сяргееўна на невялікія адтуліны ў паддонах, у якой растуць агуркі.

На ўпакоўцы з ватай заўважаю надпіс на лацінцы. Аказваецца, вытворца мінеральнай ваты для агуркоў - гэта Польшча.

- У Беларусі мінеральную вату не вырабляюць?

- Вырабляюць, ды вось толькі якасць горшая, і ўраджайнасць не тая, - кажа тэхнолаг.

Да кожнай сцяблінкі падведзеная свая трубачка: расліны пояць пажыўным растворам, дарэчы, таксама імпартным, як і ўгнаеннямі.

Насенне ў цяпліцы ў асноўным галандскія. Высвятляецца, у іх вельмі добрая селекцыя, яны менш хварэюць і ўраджайнасць досыць высокая.

- Вы ведаеце, я нават не ведаю, ці вырошчвае хтосьці з цяплічных камбінатаў зімой беларускія гатункі, - задумваецца тэхнолаг. - Прынамсі, да нас ніхто з селекцыянераў не звяртаўся, каб апрабаваць гатунак.

«Гэтыя агуркі будзем гадаваць да сакавіка, потым размесцім таматы»

Доўгія зялёныя агуркі звісаюць са сцёблаў, верхавіны якіх губляюцца недзе пад столлю. Цяпер работнікі абрываюць лішняе лісцё. Паводле стандарту, на агурках іх павінна быць не больш за 18.

- Першае насенне мы пасеялі 9 лістапада. А першыя агуркі сабралі ўжо ў пачатку снежня, - тлумачыць тэхнолаг. Усяго ж ад моманту цвіцення да агурка таварнага выгляду праходзіць два тыдні.

- Гэтыя агуркі мы будзем гадаваць да сакавіка, а потым прыбяром, і таматы размесцім, - распавядаюць у цяпліцы.

Ніна Сяргееўна вядзе нас у аператарскую. Гэта як цэнтр кіравання палётаў. Тут стаяць кампутары, якія сочаць за мікракліматам у цяпліцы.

- Вось тут тэмпература, вільготнасць, адсотак адкрыцця фортачак, наяўнасць вуглякіслага газу, - тлумачыць графікі Ніна Сяргееўна. - Таксама сочым за навакольным асяроддзем. Асветленасць, вецер і тэмпература. У залежнасці ад гэтага выбіраем рэжым. За ўсім ідзе кругладзённы кантроль.

Са снежня і да студзеня свет у цяпліцах гарыць па 20 гадзін. Без гэтага, высвятляецца, агуркі не будуць смачнымі.

- Толькі з 18 лютага мы пяройдзем на вырошчванне агуркоў пры натуральным асвятленні, - кажуць у цяпліцы. - А агуркі, званыя ў народзе «з пупырышкамі», і таго пазней станем вырошчваць.

На складзе прадпрыемства трохі скрынак. Штодня адсюль вязуць ад пяці да 12 тон акуратна ўпакаваных доўгіх агуркоў. Асноўны спажывец іх - Беларусь, лішкі вывозяць у Расею. У Еўропу беларускія агуркі не ідуць.

- Там галандскія цяпліцы разараюцца, рынак насычаны, нам туды не патрапіць, - кажуць на складзе і загружаюць яшчэ адну машыны агуркамі.

Меркаванне дырэктара

«Калі б кошт на газ быў хоць бы 200 даляраў, то агуркі столькі б не каштавалі»

- Так, з беларускага ў нашых агурках, напэўна, толькі праца, - канстатуе дырэктар Менскай агародніннай фабрыкі Васіль Прачэўскі. - На жаль, доля імпарту ў нашым агурку дзесьці 92 адсоткі, а не 80, як «Камсамолка» пісала. Таму і цана на гародніну вырасла.

Цяпер агуркі ў фірмовай краме фабрыкі прадаюць па 39 - 45 тысяч, а ў снежні цэннік быў і таго большы - 48 тысяч. Магазіны Менска прадавалі іх ужо па 50 - 55 тысяч.

- Вось разважце самі, як у такіх умовах не падымаць кошт, калі насенне ў параўнанні з мінулым годам падаражэла больш, чым напалову. - Калі адно семечка летась каштавала 619 рублёў, то на 1 студзеня цэннік склаў ужо 963 рублі. Кошт на мінеральную вату вырас з 29 да 37 тысяч рублёў за штуку.

- Амаль на 30 адсоткаў у рублях вырас кошт угнаенняў і на некаторыя сродкі абароны, - адзначаюць эканамісты.

- Але гэта яшчэ не самае балючае - кажа дырэктар. - Больш за ўсё нас падкасіў кошт на газ. Гэта асноўнае, ад чаго расце кошт агуркоў. Бо цяпліцы цэлы дзень ацяпляюцца газам. Мы вымушаныя аплачваць газ па 303 даляры за тысячу кубаметраў. Пры гэтым Расея прадае Беларусі газ па 150 даляраў за тысячу кубаметраў. Калі б мы маглі купляць газ па 200 даляраў, то кошт на агуркі ўпаў бы на 30 адсоткаў.