З банкаўскіх картак беларусаў працягваюць знікаць грошы
27- 10.06.2009, 12:53
Незалежныя аналітыкі, нягледзячы на апраўданні Нацбанку, сцвярджаюць, што грошы былі фактычна экспрапрыяваныя.
Праблемы ў беларускіх банкаматаў пачаліся 4 чэрвеня. Кліенты не маглі зняць наяўныя або ажыццявіць плацяжы. Спачатку сцэнар быў аднолькавы – чалавек рабіў адпаведны запыт, грошы не здымаліся, плацяжы не ажыццяўляліся. А паказаныя сумы з рахункаў знікалі, піша расейскае выданне «Новые Известия».
У беларускіх блогах сітуацыю апісвалі прыкладна так. Калі людзі спрабавалі зняць наяўныя грошы або здзейсніць безнаяўныя плацяжы, на экране банкаматаў на ангельскай мове з'яўляўся надпіс: «Калі ласка, чакайце». Пасля банкамат некалькі хвілін думаў, не рэагуючы на націск кнопак, і да радасці ўжо паспеўшага спалохацца ўладальніка карткі «выплёўваў» яе назад. З наступнымі ў чарзе да банкамата адбывалася тое ж самае. Колькасць жадаючых атрымаць наяўныя павялічвалі людзі, якія не маглі разлічыцца з дапамогай банкаўскай карткі ў краме. Такім чынам, перад банкаматамі раслі чэргі з людзей, кожны з якіх спадзяваўся на тое, што яму пашанцуе больш, чым суседу. У выніку ў беларускай сталіцы не працавалі банкаматы найбуйнога банка краіны – «Беларусбанка».
З карэспандэнтам «Новых известий» адбылася падобная сітуацыя. Бліжэйшы да дома банкамат паказаў, што ў яго на рахунку каля 200 тыс. беларускіх рублёў. Аднак зняць іх не атрымлівалася – банкамат паведамляў, што на картцы «недастаткова грошай». Прыйшлося здымаць па дробязі, аднак атрымалася зняць толькі каля 50 тыс. беларускіх рублёў. На наступны дзень пакінутая сума з рахунку проста знікла.
У Нацыянальным банку выказалі версію аб тым, што беларускія банкаматы атакаваў вірус, і апошнія праблемы маглі быць звязаныя з распаўсюджваннем новага небяспечнага кампутарнага «чарвяка». Па некаторых дадзеных, нават у самім Нацбанку для прафілактыкі на два дні працаўнікам абмежавалі доступ у Інтэрнэт. Аднак гэтую версію хутка аспрэчылі. Намеснік гендырэктара ААТ «Банкаўскі працэсінгавы цэнтр» (БПЦ) Алена Адзіночанка паведаміла журналістам, што «у складаных апаратна-праграмных комплексах, якія апрацоўваюць вялікія аб'ёмы дадзеных, тэхнічныя збоі падобнага кшталту магчымыя». Па словах відавочцаў, збоі кранулі прылады і трох іншых банкаў (Белінвестбанк, БПС-банк і Белаграпрамбанк), якія таксама абслугоўваюцца ў БПЦ. Дарэчы, прыкладна з 6,2 млн. эмітаваных у краіне банкаўскіх пластыкавых картак ільвіная доля была выпушчаная менавіта чацвёркай найбуйных банкаў краіны. Яны ж валодаюць і самай вялікай сеткай банкаматаў.
Начальнік упраўлення інфармацыі Нацыянальнага банка Анатоль Драздоў паведаміў журналістам, што да раніцы 5 чэрвеня тэхнічныя непаладкі былі ўхіленыя. Аднак па гэты дзень сітуацыя не змянілася.
Збоі здараліся і раней, але, як правіла, насілі лакальны характар. Такога масавага знікнення грошай з картак яшчэ не было. Учора прэс-сакратар «Беларусбанка» Сяргей Верашчак паведаміў, што «праблема паўстала ў праграмным забеспячэнні». Па словах Верашчака, «усё адбылося па віне Банкаўскага працэсінгавага цэнтра, які абслугоўвае карткі нашага і некаторых іншых банкаў. Мы адказваем за тео, каб банкамат быў спраўны, не меў механічных пашкоджанняў».
Аднак з версіяй вінаватасці выключна БПЦ не вяжацца гісторыя, якая здарылася карэспандэнтам «Новых известий», бо ягоная картка не была вырабленая ў Менску, і тым больш не мела ніякага стаўлення да гэтай структуры.
