Спыненае расследаванне справы аб вандалізме ў Курапатах
2- 6.07.2009, 14:36
Крымінальная справа па факце апаганення пахаванняў у Курапатах прыпыненае нібыта з-за таго, што «не былі ўсталяваныя асобы, якія павінныя прыцягнуцца ў якасці абвінавачваных».
Аб гэтым паведаміў БелаПАН старэйшы дазнаўца УУС Менскага аблвыканкама Сяргей Паляк.
Разам з тым, як адзначыў супрацоўнік міліцыі, справа будзе адноўленая ў выпадку выяўлення асоб, датычных да злачынства.
2—3 красавіка цяперашняга года ў Курапатах недалёка ад галоўнай алеі, якая вядзе ад Крыжа пакут да вышэйшай кропкі ўрочышча, былі выяўленыя два апаганеных пахавання. Злачынцы пакінулі на пяску астанкі людзей, а таксама рэшткі іх вопраткі і абутку. Па гэтым факце 4 красавіка УУС Менскага райвыканкама ўзбуджаная справа па ч. 1 арт. 344 Крымінальнага кодэкса. 7 красавіка справа была перададзеная ва УУС Менскага аблвыканкама.
На тэрыторыі помніка гісторыі міжнароднага значэння «Месца знішчэння ахвяр палітычных рэпрэсій 1930—1940-х гадоў ва ўрочышчы Курапаты», занесенага ў Дзяржаўны спіс гісторыка-культурных каштоўнасцяў Рэспублікі Беларусь і размешчанага на паўночна-ўсходняй ускраіне Менска, , па розных адзнаках, ад 30 тыс. да 200 тыс. ахвяр сталінізму.
Ва ўрочышчы не раз здзяйсняліся акты вандалізму, і толькі аднойчы злачынцы былі ўсталяваныя. 30 мая 2009 года двое непаўнагадовых менчукоў — навучэнцы школы і прафтэхвучэльні, абвінавачаныя ў знішчэнні памятных крыжоў у Курапатах, былі амніставаныя следствам да суду. А ў сярэдзіне чэрвеня Бараўлянскі аддзел Менскага РУУС прыпыніў яшчэ адну крымінальную справу па факце знішчэння невядомымі шасці памятных крыжоў у Курапатах.
10 красавіка старшыня Беларускага добраахвотнага таварыства аховы помнікаў гісторыі і культуры Антон Астаповіч прапанаваў Міністэрству ўнутраных спраў арганізаваць сталае пешае патруляванне Курапатаў сіламі служачых вайсковай часткі 3310 — другой асобнай спецыяльнай брыгады міліцыі, што дыслакуецца ў вёсцы Аколіца Менскага раёна. Аднак УУС Менскага аблвыканкама адказала адмовай на гэтую прапанову, матывуючы сваю адмову шэргам аб'ектыўных прычын.
