Пухавіцкі бомж разукамплектаваў замаскіраваны радар
26- 28.10.2010, 11:16
Супрацоўнікі ДАІ пакінулі на ўзбочыне вуліцы замаскіраваны радар і паехалі на выклік, праз некалькі хвілінаў выявілі, што адсутнічае сувязь з радарам.
Супрацоўнікі РУУС Ленінскага раёна Менска затрымалі бамжа, які разукамплекатаваў міліцэйскі радар, паведаміў «Інтэрфакс-Захад» прэс-афіцэр Ленінскага РУУС Сяргей Козел.
«На вуліцы Трасцянецкай ў Менску з замаскіраванага міліцэйскага радара бомж скраў акумулятар. Мужчына затрыманы, вядзецца разгляд», - паведаміў прэс-афіцэр.
Паводле яго словаў, «супрацоўнікі ДАІ пакінулі на ўзбочыне вуліцы радар на трыножніку, замаскіравалі яго камуфлюючай сеткай і паехалі на выклік. Праз некалькі хвілінаў яны выявілі, што адсутнічае сувязь з гэтым радарам». «Супрацоўнікі ДАІ вярнуліся да радара і ўбачылі, што на адлегласці 50 метраў ад яго знаходзіцца бомж з акумулятарам, які ён зняў з радара. Мужчына быў затрыманы», - распавёў С. Козел.
Паводле яго словаў, «затрыманым з'яўляецца бомж з Пухавіцкага раёна, які часова атабарыўся на тэрыторыі аднаго з буйных прадпрыемстваў у Ленінскім раёне».