Джынсавы пікет у цэнтры Менска каля ГУМа (Фота, відэа)

6.10.2010, 14:38

Грамадзянская кампанія «Джынс - за свабоду!» і вядомыя менчукі падтрымалі Андрэя Саннікава.

Сёння ў цэнтры Менска каля Галоўнага ўнівермага стаў «джынсавы» пікет. Апранутыя ў сінія шалікі маладыя людзі трымалі велізарную расцяжку са словамі «Джынс - за Андрэя Саннікава!». Побач былі ўсталяваныя стэнды з партрэтам Саннікава, і маладыя людзі сталі актыўна збіраць подпісы за лідара «Еўрапейскай Беларусі».

Менчукі розных узростаў - ад моладзі да людзей пенсійнага ўзросту - падыходзілі, рашуча падавалі пашпарты і ставілі подпісы. Часам утвараліся чэргі. Ніхто не вагаўся, ці ставіць подпіс. Відавочна, што людзям настолькі надакучыла цяперашняя ўлада, што наяўнасць рэальнай кандыдатуры на пост прэзідэнта запальвае ў іх надзею, прымушае мабілізавацца, каб, нарэшце, пачаць змяняць сітуацыю ў краіне.

Паставіць свае подпісы за Андрэя Саннікава прыйшлі вядомыя людзі - кіраўнікі «Свабоднага тэатра» Мікалай Халезін і Наталля Каляда, дэпутат «палаты прадстаўнікоў» 2-га склікання, генерал Валерый Фралоў, старшыня партыі «Справядлівы свет» Сяргей Калякін.

«Я прыйшоў падтрымаць свайго сябра, які з'яўляецца кандыдатам у прэзідэнты. Надыходзяць моманты, калі ты павінен падтрымліваць чалавека пастаянна. Я гляджу, як многія людзі цяпер падыходзяць і кажуць, што яны хочуць у гэты момант быць побач з Андрэем Саннікавым. Гэта і ёсць рэальная падтрымка. Не сагнаныя піянеры і пенсіянеры, якім пагражаюць высяленнем з інтэрнатаў і прымушаюць іншымі метадамі любіць свайго «лідара», а сапраўдная салідарнасць.

Саннікаў - гэта чалавек шматбаковы. Гэта як раз той чалавек, які патрэбны сёння краіне. Чалавек, адначасова разбіраецца ў палітыцы, эканоміцы, выдатны дыпламат. Мае міжнародны аўтарытэт як сярод палітыкаў, так сярод людзей творчых, што для мяне, напрыклад, з'яўляецца важным. Людзі творчыя - гэта такая лакмусавая паперка, па іх можна вызначыць, хто з'яўляецца на самой справе чалавекам прыстойным і сумленным. Так, людзі мастацтва калісьці любілі Генадзя Карпенку. І нездарма ў цяперашняй улады ў сябрах няма творчых людзей высокага ўзроўню.

Такі лідар як Саннікаў мяне задаволіць, таму што я стаміўся жыць у стане вайны. Больш не магу ваяваць з Расеяй, не магу ваяваць з Еўропай, не магу ваяваць з суседзямі. Я хачу спакойнага, нармалёвага, паслядоўнага, лагічнага, дэмакратычнага жыцця. І ў гэтым мая прагматычная пазіцыя», - сказаў падчас пікету сайту charter97.org Мікалай Халезін.